एजेन्सी – यो सिजनको युइएफए च्याम्पियन्स लिगको फाइनल फान्सको पेरिसमा हुने भएको छ । युरोपेली फुटबलको सर्वाेच्च निकाय (युइएफए) को शुक्रबार बसेको बैठकले च्याम्पियन्स लिगको फाइनल रसियाबाट फ्रान्सको पेरिसमा सारिएको जनाएको छ ।
युक्रेनमा रुसको आक्रमणपछि युइएफएको बैठकले रसियाको सेन्ट पिटर्सवर्गबाट फ्रान्सको पेरिसमा सारिएको जनाएको छ । पुर्वी युरोपमा राजनीतिक तनावले महाद्धीपको परिचालक निकायबाट निर्णायक कार्य गर्न बाध्य पारेको र संघका अध्यक्ष एलेक्सान्डर सेफरिनको अध्यक्षमा बसेको बैठकले अब रुसलाई च्याम्पियन्स लिगको फाइनल नखेल्ने अनुमति नदिने निर्णय गरेको थियो । च्याम्पियन्स लिगको फाइनल २८ मेमा हुने तालिका थियो । अब यो फाइनल पेरिसमा हुनेछ ।
युइएफएको कार्यकारी समितिले युरोपका सुरक्षा अवस्थाको स्थिति गम्भीर रहेपछि आपतकालीन बैठकको आयोजना गरेको थियो । युइएफएले विज्ञप्ति जारी गर्दै सुरक्षा अवस्थालाई ध्यानमा राख्दै फाइनल खेल सेन्ट पिटर्सवर्गबाट पेरिसमा सारिएको उल्लेख गरेको छ ।
‘युइएफए फ्रान्सका राष्ट्रपति इमानुएल म्याक्रोनलाई उनको व्यक्तिगत समर्थन र युरोपेली क्लब फुटबलको सबैभन्दा प्रतिष्ठित खेल फ्रान्समा अतुलनीय संकटको समयमा सार्नको लागि प्रतिबद्धताको लागि धन्यवाद व्यक्त गर्न चहान्छ । फ्रान्सेली सरकारको साथमा युइएफएले डरलाग्दो मानवीय पीडा, विनास र विस्थापनको सामना गर्ने युक्रेनमा फुटबल खेलाडीहरु र उनीहरुको परिवारको उद्धारको प्रावधान सुनिश्चित गर्न गरिने प्रयासलाई पूर्ण रुपमा समर्थन गर्नेछ ।’ विज्ञप्तिमा उल्लेख छ ।
यस्तै बैठकले युइउफएको प्रतियोगितामा प्रतिस्पर्धा गर्ने रुसी र युक्रेनी क्लबहरु र राष्ट्रिय टोलीले अर्काे सुचना नभएसम्म उनीहरुले घरेलु खेलहरु तटस्थ मैदानमा खेल्नुपर्ने उल्लेख गरेको छ । युइएफएको यो निर्णयसँगै फ्रान्सले २००६ पछि च्याम्पियन्स लिगको फाइनलको आयोजना गर्नेछ । त्यतिबेला बार्सिलोनाले आर्सनललाई २–१ ले पराजित गर्दै च्याम्पियन बनेको थियो ।
