एजेन्सी – प्रिमियर लिग प्रतिद्धन्द्धी चेल्सीलाई सडनडेथमा पराजित गर्दै लिभरपुल कारवाओ कप अर्थात इएफएल कपको च्याम्पियन बनेको छ । लिभरपुलले रोमाञ्चक बनेको सडन डेथमा चेल्सीलाई ११–१० ले पराजित गर्दै कारवाओ कपको च्याम्पियन बनेको हो ।
निर्धारित समय र थप गरिएको समयमा कुनै गोल निस्कन नसकेपछि खेल टाइब्रेकरमा लम्विएको थियो । टाइब्रेकरमा पनि बराबरीपछि खेल सडनडेथमा लम्विदा अन्तिम प्रहारमा किपा एरिजावालगा चुक्दा लिभरपुलले बाजी मार्न सफल भयो ।
वेम्वली स्टेडियममा आइतबार राति भएको प्रतिस्पर्धात्मक र रोमाञ्चक बनेको खेलमा दुवै टोलीले गोलका केही अवसर सिर्जना गरेपनि गोल गर्न नसक्दा खेल टाइब्रेकरमा लम्विएको थियो । टाइब्रेकरमा लिभरपुलका सबै ११ खेलाडीले गोल गर्न सक्दा चेल्सीले अन्तिम पेनाल्टी चुकाउँदा उपाधिबाट वञ्चित बन्यो ।
लिभरपुलका जेम्स मिल्नर, फाविन्हो, भर्जिल भान डाइक, ट्रेन्ट एलेक्सान्डर आर्नाेल्ड, मोहम्मद सलाह, डिएगो जोटा, डिभोक ओरिगी, एन्ड्रिउ रोबर्टसन, हार्भे इलिओट, इब्राहिमा कोनाट र काओइम केलेहेरले गोल गरे ।
चेल्सीका मार्काेस अलन्सो, रोमेलु लुकाकु, काई हाभर्टज, रिस जेम्स, जर्गिन्हो, एन्टेनियो रुडिगर, एङ्गोलो कान्टे, टिमो वेर्नर, थियागो सिल्भा र ट्रिभो चलोवाह गोल गर्दा अन्तिम पेनाल्टीमा गोलरक्षक किपा एरिजावालगा चुके।
च्याम्पियन बनेसँगै लिभरपुल कारवाओ कप सर्वाधिक जित्ने टोली बनेको छ । लिभरपुलले ९ पटक तथा म्यानचेस्टर सिटीले ८ पटक उपाधि जितेको छ ।
लिभरपुल २०११–१२ को सिजनपछि च्याम्पियन बनेको हो । त्यसपछि चेल्सी २०१५–१६ को सिजनमा फाइनलमा पुगेपनि म्यानचेस्टर सिटीसँग पराजित हुँदै उपाधि विमुख बनेको थियो ।
यता, चेल्सी २०१४–१५ को सिजनपछि च्याम्पियन बन्ने संघारमा पुगेपनि असमर्थ रह्यो । यो सिजनपछि चेल्सीले २०१८–१९ मा फाइनल खेल्दा म्यानेचस्टर सिटीसँग पराजित भएको थियो ।
