एजेन्सी – सब्सिच्युट विंगर फरवार्ड औसमाने डेम्वेलेले एक गोलसँगै दुई असिस्ट दिएपछि क्याटलान क्लब बार्सिलोनाले स्पेनिस ला लिगामा सानदार जित दर्ता गरेको छ । बार्सिलोनाले एथलेटिको बिल्वाओलाई घरेलु मैदानमा ४–० को भारी अन्तरले पराजित गरेको हो ।
विन्टर ट्रान्सफरमा केही खेलाडी भित्र्याएको बार्सिलोनामा त्यसको सकरात्मक प्रभाव देखिदा आइतबार राति बिल्वाओविरुद्ध बार्सिलोनाको जितमा पिएरे इमिरिक औवामियाङ, औसमाने डेम्वेले, लुक डि जोङ र मेम्फिस डिपाएले गोल गरे । पहिलो हाफमा एक गोल गरेको बार्सिलोनाले दोस्रो हाफमा तीन गोल थपेको थियो ।
क्याम्प नोउमा बार्सिलोनाले खेलको ३७औं मिनेटमा पिएरे इमिरिक औवामियाङको गोलबाट अग्रता लिएको थियो । ड्यानी आल्भेसको कर्नरमा जेरार्ड पिकेको हेडर क्रसबारमा लागेर फर्कदा औवामियाङले ६ यार्ड बक्सभित्रबाट खाली पोस्टमा जाली चुमाएका थिए ।
दोस्रो हाफमा भने सब्सिच्युट विंगर फरवार्ड औसमाने डेम्वेले चम्किए । ६७औं मिनेटमा फेरान टोरेसको स्थानमा मैदान छिरेका डेम्वेलेले मैदान छिरेको छैटौं मिनेट अर्थात ७३औं मिनेटमा गोल गर्दै बार्सिलोनाको अग्रता दोब्बर पारे । उनले अर्का सब्सिच्युट फ्रान्की डि जोङको पासमा गोल गर्न सफल भएका थिए ।
इन्ज्युरी समयको थप गरिएको पहिलो मिनेटमा लुक डि जोङले डेम्वेलेको पासमा गोल गर्दै बार्सिलोनालाई ३–० ले अघि बढाए । त्यसपछि इन्ज्युरी समयको थप गरिएको तेस्रो मिनेटमा अर्का सब्सिच्युट फरवाडै मेम्फिस डिपाएले गोल गर्दै बार्सिलोनालाई सानदार जित दिलाए । ८२औं मिनेटमा एडमा ट्राओरेको स्थानमा मैदान छिरेका डिपाएले डेम्वेलेको पासमा गोल गर्न सफल भएका थिए ।
योसँगै बार्सिलोनाले २१ जनवरीमा कोपा डेल रेको प्रि–क्वाटरफाइनलमा भोगेको हारको बदला लिएको छ । बार्सिलोना त्यतिबेला अतिरिक्त समयमा ३–२ ले पराजित भएको थियो । त्यसयता अपराजित रहेको बार्सिलोनाले ५ जित र २ बराबरीको नतिजा निकालेको छ ।
यो जितसँगै बार्सिलोना २५ खेलबाट ४५ अंक जोडेर चौथो स्थानमा उक्लिएको छ । समान ४५ अंक रहेपनि गोलअन्तरमा एट्लेटिको म्याड्रिड पछि परेको छ । बार्सिलोना एक खेल बढी खेलेको शीर्षस्थानको रियल म्याड्रिडभन्दा १५ अंकले पछि छ । पराजित बिल्वाओ २६ खेलबाट ३७ अंक जोडेर आठौं स्थानमा रहेको छ ।
