एजेन्सी – प्रिमियर लिग क्लब लिभरपुलका डिफेन्डर भर्जिल भ्यान डाइकले आफूहरु उपाधि दौडमा रहेको बताएका छन्। एक मिडियासँग कुराकानी गर्नेक्रममा भान डाइकले लिभरपुल अझै उपाधि दौडमा रहेको बताएका हुन्।
डेली मेललाई अन्तर्वार्ता दिनेक्रममा भान डाइकले सिजनका धेरै खेल बाँकी रहेका कारण लिभरपुल अझै उपाधि दौडमा रहेको बताए। लिग जित्न सकिन्छ भन्ने विश्वास लिएर अगाडी बढ्नुपर्ने उनको भनाई छ।
“यदि कसैले उपाधि दौडमा विश्वास गर्दैन भने उ हाम्रो समर्थक नै होइन। हामी खेल जित्छौं र उपाधि दौडलाई उल्ट्याउन सक्छौं भन्ने कुरामा विश्वास गर्नुपर्छ। अझै धेरै खेल खेल्न बाँकी नै छ।”,डेली मेलसँगको अन्तर्वार्ताका क्रममा भान डाइकले भने।
लिभरपुल उपाधि दौडमा रहेको दावी गरिरहँदा उनले सिटी धेरै नै राम्रो टोली रहेको बताउन भने छुटाएनन्। भान डाइकले केहि वर्ष अगाडी लिभरपुल अगाडी रहेर पनि सिटीले भेट्टाएको र पछि पारेको स्मरण गरे।
भान डाइकका अनुसार लिभरपुल अहिले राम्रो अवस्थामा छ। सुधार गर्न पर्ने धेरै कुराहरु रहेपनि लिभरपुलले स्थिरता देखाइरहेको भान डाइकले बताए। स्थिरताकै कारण सिटीलाई टक्कर दिने दिन सकिरहेको उनको भनाई छ।
उनले भने,”हामी अहिले राम्रो स्तरमा छौं। सुधार गर्नुपर्ने धेरै कुरा छन्। तर पनि तर हामीले देखाएको स्थिरता महत्त्वपूर्ण छ। यसै कारण हामी सिटीसँगको प्रतिष्पर्धामा छौँ।”
