एजेन्सी – रियल म्याड्रिडका गोलरक्षक थिबाउट कोर्टियसले करिम बेन्जेमा विश्वकै उत्कृष्ट नम्बर ९ रहेको बताएका छन्। च्याम्पियन्स लिगमा पेरिस सेन्ट जर्मेन(पिएसजी)लाई पाखा लगाएर रियल क्वाटरफाइनलमा प्रवेश गरेपछि कोर्टियसले बेन्जेमा विश्वकै उत्कृष्ट नम्बर ९ रहेको बताएका हुन्।
खेलपछि पत्रकारहरुसँग कुराकानी गर्दै कोर्टियसले बेन्जेमा रोबर्ट लेवान्डोस्की भन्दा पनि उत्कृष्ट रहेको बताए। त्यसक्रममा कोर्टियसले अन्तिम १६ को दोस्रो लेगमा लेवान्डोस्कीले ह्याट्रिक गरेको भएपनि उनले दुई गोल पेनाल्टीमा गरेको उल्लेख गरे।
कोर्टियसका अनुसार बेन्जेमा बालोन डी’ओरमा राम्रो स्थानका लागि योग्य छन्। बेन्जेमा सन् २०२१ को बालोन डी’ओरमा चौंथो स्थानमा रहेका थिए। त्यसतर्फ इंकित गर्दै कोर्टियसले यस वर्षको बालोन डी’ओरमा बेन्जेमा उच्च स्थानको हकदार रहेको बताए।
“करिम बेन्जेमा विश्वको उत्कृष्ट नम्बर ९ हुन्। लेवान्डोस्कीले पनि ३ गोल गरेका थिए। तर ती मध्ये दुई पेनाल्टी गोल थिए। आज बेन्जेमाले बालोन डी’ओरमा उच्च स्थान प्राप्त गर्नु पर्छ भन्ने प्रमाणित गरे।”,कोर्टियसले भने।
पिएसजी विरुद्ध बेन्जेमाले १९ मिनेटको अन्तरालमै ह्याट्रिक पूरा गरेका थिए। बेन्जेमाको ह्याट्रिककै कारण रियल म्याड्रिड च्याम्पियन्स लिगको अर्को चरणमा प्रवेश गरेको छ। उत्कृष्ट प्रदर्शन पश्चात बेन्जेमा बालोन डी’ओर दौडमा ठूलो छलांग मार्ने धेरैको अनुमान छ।
