एजेन्सी – प्रिमियर लिग क्लब लिभरपुल लिगको शिर्ष स्थानमा उक्लिएको छ। शनिबार साँझ भएको खेलमा न्यूक्यासललाई पराजित गर्दै लिभरपुल प्रिमियर लिगको शिर्ष स्थानमा उक्लिएको हो।
न्यूक्यासलको घरेलु मैदानमा शनिबार भएको खेलमा लिभरपुलले १-० को जित निकाल्यो। खेलभर न्यूक्यासललाई दबावमा राखेपनि लिभरपुलले १ गोल भन्दा बढी गर्न सकेन। लिभरपुलका लागि निर्णायक गोल न्याबी केइटाले गरे। खेलको १९ औं मिनेटमा उनले गरेको गोल नै निर्णायक बन्न पुग्यो।
खेलभर लिभरपुलले न्यूक्यासललाई नियन्त्रणमा राखेको थियो। बलमा लिभरपुलको ६६ प्रतिशत नियन्त्रण थियो। खेलभर लिभरपुलको तर्फबाट कुल ३४ प्रहार भएका थिए। जस मध्ये १० प्रहार टार्गेटमा थिए। त्यस्तै न्यूक्यासलले भने खेलभर ४ प्रहार गरेको थियो। ती मध्ये २ प्रहार टार्गेटमा थिए।
न्यूक्यासल विरुद्धको जितसँगै लिभरपुल प्रिमियर लिगको शिर्ष स्थानमा उक्लिएको छ। सिजनका ३४ खेल खेल्दा लिभरपुलले ८२ अंक बनाएको छ। लिभरपुलले २५ खेलमा जित निलाल्दा मात्रै दुई खेलमा हारेको छ।
आज राति नै दोस्रो स्थानमा रहेको म्यानचेस्टर सिटीले लिड्स युनाइटेडको सामना गर्दैछ। सो खेलमा सिटी विजयी भएको खण्डमा लिभरपुल पुनः दोस्रो स्थानमा झर्नेछ। तर सिटी पराजित भएको खण्डमा अथवा बराबरी खेलेको खण्डमा भने लिभरपुल शिर्ष स्थानमा नै रहनेछ।
त्यस्तै न्यूक्यासल भने प्रिमियर लिगको नवौं स्थानमा छ। सिजनका ३५ खेल खेल्दा उसले मात्रै ११ खेलमा जित निकालेको छ भने १४ खेलमा हारेको छ। न्यूक्यासलको ४३ अंक छ।
