एजेन्सी – यस सिजनको जर्मन बुन्डेसलिगा जितिसकेको बायर्न म्युनिख जर्मनले हार बेहोरेको छ । बायर्न घरेलु टोली मेइन्जसँग ३–१ ले पराजित भएको हो ।
मेइन्जको जितमा जोनाथन, मोउसा नियाकाथे र लियान्द्रो बारेइरोले गोल गोल गरे । बायर्नका लेवान्डोस्कीले एक गोल फर्काए । ओपेल एरिना मेइन्जमा शनिबार राति भएको खेलमा घरेलु टोलीले खेलको १८औं मिनेटमा जोनाथनको गोलबाट अग्रता लिएको थियो । उनले डोमिनिकको पासमा गोल गर्न सफल भएका थिए ।
२७औं मिनेटमा मोउसा नियाकाथेले एन्टोन स्ट्याचको पासमा गोल गर्दै मेइन्जको अग्रता दोब्बर पारे । ३३औं मिनेटमा लेवान्डोस्कीले गोल गर्दै बायर्नलाई खेलमा फर्काउने संकेत दिए । तर, ५७औं मिनेटमा लियान्द्रो बारेइरोले गोल गर्दै बायर्नलाई हारको स्वाद चखाए ।
यो जितसँगै मेइन्ज ३२ खेलबाट ४२ अंक जोडेर नवौं स्थानमा रहेको छ । पराजित बायर्न ७५ अंक जोडेर शीर्षस्थानमा रहेको छ ।
