काठमाडौं – हप्तामा दुई दिन बिदा दिने निर्णय व्यावहारिक नभएको भन्दै निजी विद्यालयका तीन संस्थाले दुई दिन बिदा लागु नगर्ने जनाएका छन् । तर, शिक्षक महासंघले भने सरकारले गरेको निर्णय कार्यान्वयन गर्नुपर्ने बताएको छ । यो समाचार नेपाल समाचारपत्रमा प्रकाशित छ।
उच्च शिक्षालय तथा माध्यमिक विद्यालय संघ नेपाल (हिसान) ले अव्यावहारिक बिदा कार्यान्वयन नगर्ने स्पष्ट पारेको छ । प्याब्सन र राष्ट्रिय प्याब्सन (एन प्याब्सन)ले सरकारको निर्णय कार्यान्वयन गर्न मुस्किल हुने जनाएको छ । प्याब्सनका अध्यक्ष डिके ढुंगानाले अव्यावहारिक विषयमा छलफल गरेर मात्र निर्णय गर्ने बताउनुभयो ।
उहाँले भन्नुभयो– ‘अधिकांश विद्यालयका विद्यार्थी हिँडेरै विद्यालय पुग्ने गरेका छन् । शहरका केही विद्यालयमा मात्र सवारी साधनको व्यवस्था देखिएको छ । त्यसैले इन्धन खपतकै कारण देखाएर दुई दिन बिदा दिन हुँदैन ।’ उहाँले दुई दिन बिदा दिँदा पठनपाठन, परीक्षालगायत सबै विषयमा समस्या पर्ने बताउनुभयो ।एन प्याब्सनका सहअध्यक्ष सुवास न्यौपानेले पाठ्यभारको विषयमा निर्णय नगरी दुई दिन बिदा दिने निर्णय गर्नु उचित नभएको धारणा राख्दै भन्नुभयो– ‘सरकारले यस्तो निर्णय गर्दा छलफल गरेर मात्र गर्नुपर्छ । हचुवाको भरमा सरकारी कार्यालयजस्तो शिक्षण संस्थाको मूल्याङ्कन गर्नु उचित हुँदैन ।’
हिसानका अध्यक्ष रमेश सिलवालले दुई दिन बिदाले विद्यार्थीको पढाइमा गम्भीर असर पार्ने ठोकुवा गर्दै सरकारको यस्तो अव्यावहारिक बिदा कार्यान्वयन नहुने स्पष्ट पार्दै भन्नुभयो– ‘हामी शनिबार बिदा दिन सक्छौं, दुई दिन सम्भव छैन । दुई दिने बिदाले सरकारले लागु गरेको पाठ्यभार पूरा हँुदैन र शैक्षिक सत्र सक्न पनि मुस्किल हुनेछ ।’सरकारले पेट्रोलियम पदार्थको खपत कम गर्न भन्दै सबै सरकारी निकाय र शिक्षण संस्था दुई दिन बिदा दिने निर्णय गरेको थियो । सो निर्णय यही जेठ १ गतेबाट लागु हँुदैछ । दुई दिन बिदाका कारण जेठमा लगातार चार दिन बिदा हुने भएको छ ।
नेपाल शिक्षक महासंघका अध्यक्ष कमला तुलाधरले सरकारले गरेको निर्णय कार्यान्वयन गर्नुपर्ने बताउनुभयो । तर, अधिकांश सामुदायिक विद्यालयको सवारी साधन नभएको अवस्थामा इन्धन खपत गर्ने भन्दै बिदा दिनु ठिक हो त ? भन्ने प्रश्नमा उहाँले भन्नुभयो– ‘हामी छलफल त गरौंला तर महासंघको भनाइ सरकारको निर्णय कार्यान्वयन गर्र्नुपर्ने देखिन्छ ।’१ सय ८० दिन पढाउनुपर्ने व्यवस्थाको बारेमा उहाँले भन्नुभयो– ‘यो विषयमा सोचौंला । अधिकांश प्रधानाध्यापकले दुई दिने बिदा दिनु उचित नभएको धारणा व्यक्त गरेका छन् । के निर्णय गर्ने ? भन्ने विषयमा केही दिनपछि सोचौंला ।’ उहाँले बिहान चाँडै विद्यालय खोलेर कक्षा सञ्चालन गर्दा कुनै समस्या नपर्ने बताउनुभयो ।
अभिभावक महासंघका अध्यक्ष शुप्रभात भण्डारीले दुई दिने बिदाको विषयमा अभिभावकले मिश्रित धारणा व्यक्त गर्न थालेको बताउँदै भन्नुभयो– ‘पाठ्भार नघटाई बिदा दिँदा शैक्षिकसत्र पूरा गर्न समस्या हुन्छ । यस विषयमा छलफल गरेर मात्र निर्णय गर्नु उचित हुन्छ ।’ उहाँले दुई दिन बिदा दिने वा नदिने विषयमा निर्णय गर्न स्थानीय सरकारलाई जिम्मा दिनुपर्ने बताउनुभयो । शिक्षाविद् प्राडा विद्यानाथ कोइरालाले सवारी साधन प्रयोग गर्ने विद्यालयको संख्या नगण्य मात्रामा रहेको र त्यसैको आधारमा इन्धन खपत बच्ने बहाना बनाएर बिदाको निर्णय गर्नु गलत भएको टिप्पणी गर्नुभयो ।
