एजेन्सी – प्रिमियर लिग क्लब म्यानचेस्टर युनाइटेडका पोर्चुगिज मिडफिल्डर ब्रुनो फर्नान्डेजले गोलमा भन्दा पनि उपाधिमा बढी चासो रहेको बताएका छन्। सोमबार राति प्रिमियर लिगमा ५० गोल पूरा गरेपछि पत्रकारहरुसँग कुराकानी गर्नेक्रममा ब्रुनो फर्नान्डेजले धेरै गोल गर्ने भन्दा पनि धेरै उपाधि जित्दै कुरा महत्वपूर्ण हुने बताएका हुन्।
सोमबार राति युनाइटेडले घरेलु मैदानमा ब्रेन्टफोर्डलाई पराजित गर्यो। युनाइटेडले ब्रेन्टफोर्डलाई ३-० को गोल अन्तरले पराजित गर्न सफल सफल भएको थियो। सो खेलमा फर्नान्डेसले पनि गोल गरेका थिए।
फर्नान्डेजले नवौं मिनेटमा गोल गर्दै टोलीलाई अग्रता दिलाएका थिए। सो गोल सँगै युनाइटेडका लागि फर्नान्डेजले ५० गोल पूरा गरेका छन्। खेलपश्चात पत्रकारहरुसँग कुराकानी गर्नेक्रम फर्नान्डेजले आफू गोल गनेर नबस्ने बताए। गोल भन्दा पनि उपाधि गन्ने उनको चाहना छ।
“मैले गोल गरेको धेरै समय भएको थियो। गोल गर्न सक्दा मा खुशी छु। तर ती संख्याहरू मेरो लागि खासै धेरै महत्व राख्दैनन्। म गोल भन्दा पनि उपाधि गन्न चाहन्छु।”,फर्नान्डेसले भने।
युनाइटेडले सोमबार राति सिजनको अन्तिम होमगेम खेलेको थियो। सिजनका बाँकि दुवै खेल अन्य क्लबका मैदानमा छ्न्। अन्तिम घरेलु खेलमा राम्रो प्रदर्शन गर्न सकेकोमा फर्नान्डेसले खुशी व्यक्त गरे। जारी सिजनमा राम्रो स्तरमा रहन नसकेपनि अन्तिम होमगेममा आफूहरुले राम्रो गर्न सकेको उनको भनाई छ।
