एजेन्सी – प्रिमियर लिग क्लब लिभरपुलका स्टार फरवार्ड मोहम्मद सलाहले च्याम्पियन्स लिगको फाइनलमा रियल म्याड्रिडसँग गर्ने चाहना व्यक्त गरेका छन्। मंगलबार राति स्पेनिस प्रतिद्धन्द्धी भिल्लारियललाई सेमिफाइनलको दोस्रो लेगमा पराजित गरेपछि सलाहले फाइनलमा रियलको सामना गर्ने आफ्नो चाहना रहेको बताएका हुन्।
मंगलबार राति लिभरपुल युइएइफए च्याम्पियन्स लिगको फाइनलमा प्रवेश गर्यो। भिल्लारियललाई सेमिफाइनलको दुवै लेगमा पराजित गर्दै लिभरपुल फाइनलमा प्रवेश गरेको हो। पहिलो हाफमा २-० को गोल अन्तरले पछाडी परेर पनि लिभरपुलले दोस्रो हाफमा उत्कृष्ट पुनरागमन गर्यो।
लिभरपुलको पूनरागमन जितमा फाविन्हो, लुइस डियाज र साडियो मानेले गोल गरे । भिल्लारियलका बोउलाय डिया र फ्रान्सिस कोक्विलिनको गोल सान्त्वना बन्न पुग्यो।
खेल पश्चात पत्रकारहरुसँग कुराकानी गर्दा सलाहले म्यानचेस्टर सिटीसँग कयौं पटक खेलिसकेका कारण च्याम्पियन्स लिगको फाइनलमा रियलको सामना गर्न आफू इच्छुक रहेको बताए। च्याम्पियन्स लिगको फाइनलमा रियलसँग बदला लिने सलाहको चाहना छ।
सन् २०१८ मा लिभरपुल च्याम्पियन्स लिगको फाइनलमा पराजित भएको थियो। त्यस बेला रियल ३-१ को गोल अन्तरले पराजित भएको थियो। सो हारको बदला लिनको लागि रियल फाइनलमा आइपुगोस् भन्ने सलाह चाहन्छन्।
उनी भन्छन्,”सिटी साँच्चै कठिन टोली हो, हामीले यस सिजनमा उनीहरूसँग केही पटक खेलेका छौं। यदि तपाईंले मलाई व्यक्तिगत रूपमा सोध्नुहुन्छ भने म म्याड्रिडलाई रुचाउँछु। हामी फाइनलमा उनीहरूसँग हारेका थियौं, त्यसैले म उनीहरूसँग खेल्न चाहन्छु।”
