एजेन्सी – फरवार्ड लियोनेल मेस्सी र केलियन एमबाप्पे चम्किएको खेलमा पेरिस सेन्ट जर्मेन (पिएसजी) ले फ्रेन्च लिग वानमा सानदार जित दर्ता गरेको छ ।
यो सिजनको लिग वान च्याम्पियन बनिसकेको पिएसजीले घरेलु टोली मोन्टपेलिएरलाई ४–० ले पराजित गरेको हो । पिएसजीको जितमा मेस्सीले दुई गोल गर्दा केलियन एमबाप्पेले दुई असिस्टसँगै एक गोल गरे । एक गोल एन्जल डि मारियाको नाममा रह्यो ।
मोन्टपेलिएरमा शनिबार राति भएको खेलको छैटौं मिनेटमा मेस्सीको गोलबाट अग्रता बनाएको थियो । उनले एमबाप्पेको पासलाई सदुपयोग गरेका थिए । २०औं मिनेटमा एमबाप्पेकै पासमा मेस्सीले व्यक्तिगत र टोलीको लागि दोस्रो गोल गर्दै अग्रता दोब्बर पारे ।
२६औं मिनेटमा एन्जल डि मारियाले गोल गरेपछि पिएसजी पहिलो हाफमा ३–० ले अघि बढ्यो । ६०औं मिनेटमा अघिल्लो दुई गोलमा असिस्ट दिइसकेका एमबाप्पेले पेनाल्टीमा गोल गर्दै पिएसजीको फराकिलो जित पक्का गरे ।
यो जितसँगै च्याम्पियन बनिसकेको पिएसजीको ३७ खेलबाट ८३ अंक पुगेको छ । पिएसजीले दोस्रो स्थानको मोनाकोलाई १५ अंकले पछि पारेको छ । पराजित मोन्टपेलिएर ४३ अंक जोडेर १३औं स्थानमा रहेको छ ।
