एजेन्सी – फरवार्ड ह्यारी केनको पेनाल्टी गोलमा टोटेनहम हटस्परले इंग्लिस प्रिमियर लिगमा महत्वपूर्ण जित निकालेको छ । टोटेनहमले घरेलु मैदानमा बर्नलेलाई १–० ले पराजित गर्दै शीर्ष चारमा रहने सम्भावना बलियो बनाएको छ ।
टोटेनहम हटस्पर स्टेडियममा आइतबार साँझ भएको खेलमा घरेलु टोलीले ६९ प्रतिशत बल पोसेसन राख्दै लगातार दवाव बढाएपनि गोलको लागि पेनाल्टीकै सहारा लिनुपरेको थियो ।
पहिलो हाफको इन्ज्युरी समयको थप गरिएको आठौं मिनेटमा केनले पेनाल्टीमा गोल गर्दै घरेलु टोलीलाई अग्रता दिलाए । एस्ले बार्नेसले पेनाल्टी बक्समा ह्यान्ड गर्न पुगेपछि रेफ्रीले भिएआरको सहायता लिदै टोटेनहमलाई पेनाल्टी प्रदान गर्दा केन चुकेनन् ।
त्यसपछि दोस्रो हाफमा पनि टोटेनहमले लगातार दवा सिर्जना गरेपनि थप गोल निस्कन नसक्दा पहिलो हाफमा केनले गरेको पेनाल्टी गोल नै टोटेनहमको जितमा निर्णायक बन्यो ।
यो महत्वपूर्ण जितसँगै टोटेनहमको ३७ खेलबाट ६८ अंक जोडेर चौथो स्थानमा रहेको छ । एक खेल कम खेलेको आर्सनलको ६६ अंक छ । पराजित बर्नले ३४ अंक जोडेर १७औं स्थानमा रहेको छ ।
