एजेन्सी – इटालियन क्लब युभेन्टसका अर्जेन्टिनी फरवार्ड पाउलो डिबालाले सिजनको अन्त्यसँगै क्लब छाड्ने भएका छन् । युभेन्टससँग सम्झौता नविकरण नगरेका उनले क्लब छाड्ने घोषणा गरेका हुन् ।
२८ वर्षीय फरवार्डले युभेन्टसका लागि २ सय ९१ खेल खेल्दै १ सय १५ गोल गरेका छन् । उनले यस सिजान ३७ खेलमा १५ गोल गरे । सन् २०१५ मा पालेर्मोबाट आएका उनले युभेन्टससँग कुल १२ उपाधि जिते । ५ पटक लिग उपाधि जितेका उनले आफ्नो नयाँ क्लबबारे भने केहि भनेका छैनन् ।
‘भोली यो जर्सीमा मेरो अन्तिम खेल हुनेछ । मलाई सोच्न पनि कठिन भएको छ, तर यो मेरो बिदाइ हुनेछ,’ डिबालाले भने , ‘यो सहज हुने छैन । म मुस्कानका साथ मैदान प्रवेश गर्नेछु र टोलीका लागि सदाझैं भिड्नेछु ।’
‘समर्थकलाई धन्यवाद भन्न सहि शब्द मसँग छैन । यो समयमा हामीले निकै राम्रो सम्झना बनाएका छौं । मैले अझ धेरै समय बिताउन चाहेको थिएँ, तर भाग्यले हामीलाई अर्कैतर्फ डोर्याए । मैले यहाँ हुर्किएँ, सिकें, बाँचे र सपना देख्न सिकेको छु,’ उनले थपे ।
डिबालाको नाम सन् २०१९ मा इंग्लिस क्लब टोटेनहम हट्सपर र म्यानचेस्टर युनाइटेडसँग जोडिएको थियो । त्यसबेला युभेन्टसले उनलाई बेच्न मानेको थिएन । यस सिजन युभेन्टस लिगको चौथो स्थानमा रहयो । क्लबले ७ खेलमा हार्दा ९ खेल बराबरीमा सकिएको थियो ।
