एजेन्सी – स्पेनिस क्लब एटलेटिको म्याड्रिडका उरुग्वेली फरवार्ड लुइस सुआरेजले सिजनको अन्त्यसँगै क्लब छाड्ने पक्का भएको छ ।
क्लबले आइतबार सेभिल्लाविरुद्ध भएको खेलअघि सुआरेजले क्लब छाड्ने घोषणा गरेको थियो । क्लबले समर्थकबाट राम्रो बिदाइ होस् भन्दै सिजन समाप्त हुनुअघि नै घोषणा गरेको जनाएको छ ।
सुआरेजसँगै मेक्सिकन मिडफिल्डर हेक्टर हरेराले पनि क्लब छाड्ने भएका छन् । उनी भने अमेरिकी टोली हस्टन डाइनामोमा अनुबन्धित हुँदैछन् ।
सुआरेज गत सिजनको सुरुवातमा बार्सिलोनाबाट आएका थिए । बार्सिलोनाले उनको आवश्यकता नरहेको बताएपछि सुआरेजले एटलेटिको म्याड्रिडलाई आफ्नो गन्तव्य बनाएका थिए । सुआरेजकै उच्च प्रदर्शनमा एटलेटिकोले बार्सिलोना र रियल म्याड्रिडलाई पछि पार्दै लिग उपाधि जितेको थियो । सुआरेजले गत सिजन २१ गोल गर्दै उपाधि दिलाएका थिए ।
यस सिजन भने सुआरेजले ११ गोल र २ असिस्ट प्रदान गरे । उनी अब कुन क्लब जाने भने पक्का भइसकेको छैन ।
