एजेन्सी – फ्रान्सेली क्लब पेरिस सेन्ट जर्मेन (पीएसजी) का अर्जेन्टिनी स्टार फरवार्ड लियोनेल मेस्सीले यस सिजनको बालोन डि’ओर स्पेनिस क्लब रियल म्याड्रिडका फरवार्ड करिम बेन्जेमाले जित्ने बताएका छन् ।
शनिबार इंग्लिस क्लब लिभरपुललाई हराएर कीर्तिमानी १४औं पटक च्याम्पियन्स लिगको उपाधि जितेपछि मेस्सीले रियल म्याड्रिडका लामो समयका प्रतिद्वन्द्वी करिम बेन्जेमाले यस वर्षको बालोन डी’ओर जित्नुपर्नेमा आफूलाई कुनै शंका नभएको बताएका छन् ।
मेस्सीले आफ्नो करियरको अधिकांश समय बार्सिलोनामा ला लिगामा बेन्जेमासँग प्रतिद्धन्द्धीका रुपमा बिताएका थिए । यद्यपि उनी अझै पनि फ्रान्सेली फरवार्डको यो सिजनको उपलब्धिलाई मान्यता दिन्छन् ।
बेन्जेमाबारे मेस्सीले के भने ?
‘मलाई लाग्छ कि बेन्जेमाले बालोन डी’ओर जित्नुपर्छ भन्नेमा कुनै शंका छैन ।’ मेस्सीले टिवाइसी स्पोर्ट्सलाई भने, ‘यो एकदमै स्पष्ट छ कि बेन्जेमाको वर्ष शानदार रह्यो र च्याम्पियन्स लिग जित्यो । अन्तिम १६ देखिका सबै खेलमा उनले आफ्नो प्रभाव जमाए । मलाई लाग्छ यो वर्ष कुनै शंका छैन ।’
३४ वर्षीय बेन्जेमाले च्याम्पियन्स लिगमा पीएसजी, चेल्सी र म्यानचेस्टर सिटीविरुद्धको नकआउट राउण्डमा विजयीसहित १५ गोल गरेका थिए । उनले या सिजन २७ गोल र १२ असिस्टसहित ला लिगाको उपाधि पनि जितेका छन् ।
