एजेन्सी – स्पेनिस महारथी रियल म्याड्रिडका फ्रान्सेली फरवार्ड करिम बेन्जेमा यो सिजन २०२१–२२ को युइएफए च्याम्पियन्स लिगको प्लेयर अफ दि सिजन घोषित भएका छन् ।
युइएफएको टेक्निकल प्यानलले रियल म्याड्रिडका फरवार्ड करिम बेन्जेमालाई २०२१–२२ को प्लेयर अफ द सिजन घोषित गरेको हो । ३४ वर्षीय बेन्जेमाले रियल म्याड्रिडलाई च्याम्पियन्स लिगको च्याम्पियन बनाउन यो सिजन १५ गोल गरे । उनी यो सिजनको च्याम्पियन्स लिगको सर्वाधिक गोलकर्ता समेत बने ।
सन् २००९ मा फ्रान्सेली क्लब लियोनबाट म्याड्रिड आएयता बेन्जेमाले पाँचौपटक च्याम्पियन्स लिग जितेका छन् । यस्तै बेन्जेमाले पहिलोपटक च्याम्पियन्स लिगमा दोहोरो अंकमा गोल गर्न सफल रहे ।
बेन्जेमाले यो सिजन च्याम्पियन्स लिगमा १२ खेल खेल्दा १५ गोल र १ असिस्ट दिएका छन् । ति १५ गोलमध्ये बेन्जेमाले नकआउट चरणमा मात्रै १० गोल गर्न सफल भए ।
बेन्जेमाले प्रि–क्वाटरफाइनलमा पिएसजीविरुद्ध दोस्रो लेगमा ह्याट्रिक, क्वाटरफाइनलमा चेल्सीविरुद्ध चार र सेमिफाइनलमा म्यानचेस्टर सिटीविरुद्ध ३ गोल गर्न सफल भएका थिए ।
पिएसजीविरुद्ध पहिलो लेगमा १–० ले पछि परेको रियलले बेन्जेमाकै ह्याट्रिकमा दोस्रो लेगमा ३–१ को जित निकालेको थियो । चेल्सीविरुद्ध पहिलो लेगमा बेन्जेमाकै ह्याट्रिकमा ३–१ को जित निकाल्दा दोस्रो लेगमा ३–२ ले पराजिच भएपनि बेन्जेमाले एक गोल गरेका थिए ।
म्यानचेस्टर सिटीविरुद्ध पहिलो लेगमा ४–३ ले पराजित हुँदा बेन्जेमाले दुई तथा दोस्रो लेगमा अतिरिक्त समयमा ३–१ को जित निकाल्दा बेन्जेमाले निर्णायक गोल गरेका थिए । बेन्जेमा फाइनलमा भने गोल गर्न असफल रहे ।
बेन्जेमा च्याम्पियन्स लिगमा सर्वाधिक गोलकर्ताको सुचीमा चौथो स्थानमा रहेका छन् । बेन्जेमा भन्दा अघि क्रिस्टियानो रोनाल्डो (१४०), लियोनेल मेस्सी (१२५) र रोबर्ट लेवान्डोस्की (८२) अघि छन् । बेन्जेमाले ७६ गोल गरेका छन् ।
