एजेन्सी – ब्राजिली युवा विंगर भिनिसियस जुनियर युइएफए च्याम्पियन्स लिग २०२१-२२ को सिजनको युवा खेलाडी घोषित भएका छन् ।
फाइनलमा विजयी गोल गरेका स्पेनिस क्लब रियल म्याड्रिडका भिनिसियस जुनियरलाई युइएफएको टेक्निकल प्यानले २०२१÷२२ को सिजनको युवा खेलाडी घोषित गरेको हो ।
२१ वर्षीय ब्राजिलियनले फाइनलमा लिभरपुललाई १–० ले हराउँदै रियललाई कीर्तिमानी १४औं उपाधि जिताएका थिए । उनले यो सिजन च्याम्पियन्स लिगमा १३ खेल खेल समग्रमा ४ गोल र ६ असिस्ट दिए । शनिबार राति भएको खेलको ५९औं मिनेटमा फेडे भाल्भर्डेको क्रसलाई भिनिसियसले फाइनल टच दिएका थिए ।
इंग्लिस क्लब म्यानचेस्टर युनाइटेडका ब्रुनो फर्नान्डेसले पनि ६ असिस्ट दिएका छन् । विशेष गरी यो सिजन बेन्जेमा र भिनिसियसको जोडी निकै जम्यो । भिनिसियसले बेन्जेमालाई गोलका लागि असिस्ट प्रदान गरे ।
पेरिसमा भएको फाइनलपछि म्याड्रिडका प्रशिक्षक कार्लो एन्सेलोटीले फुटबलमा सबैभन्दा कठिन कुरा गोल गर्नु रहेको र त्यसका लागि समय लिनु आवश्यक रहेको र यो सिजन त्यो काम भिनिसियसले गरेको बताए ।
