एजेन्सी – इंग्लिस क्लब लिभरपुलका फरवार्ड साडियो मानेको कीर्तिमानी ह्याट्रिकमा सेनेगलले अफ्रिका कप अफ नेसन्सको छनोट चरणमा सानदार जित निकालेको छ ।
सेनेगलले घरेलु मैदानमा १० खेलाडीमा समेटिएको बेनिनलाई ३–१ ले पराजित गरेको हो । बेनिनका जुनिअर ओलाइटनले एक गोल फर्काए । सेनेगलमा शनिबार राति भएको खेलको १२औं मिनेटमा मानेले पेनाल्टीमा गोल गर्दै टोलीलाई सुरुवाती अग्रता दिलाए ।
२२औं मिनेटमा मानेले व्यक्तिगत र टोलीका लागि दोस्रो गोल गरे । ५१औं मिनेटमा पाहुना टोली बेनिन १० खेलाडीमा समेटिन पुग्यो । सेस्सी डि’अल्मेइडा सिधै रातो कार्ड खाँदै मैदानबाट बाहिरिएपछि घरेलु टोलीलाई जित निकाल्न थप सहज भएको थियो ।
६०औं मिनेटमा मानेले पेनाल्टीमा गोल गर्दै ह्याट्रिक पुरा गरेपछि सेनेगल खेलमा ३–० ले अघि बढ्यो । ८८औं मिनेटमा जुनियरले गोल गर्दै खेललाई ३–१ को स्थितिमा ल्याएपनि त्यसपछि थप गोल निस्कन नसक्दा सेनेगल विजयी हुन सफल भयो ।
बेनिनविरुद्धको ह्याट्रिकसँगै माने सेनेगलको सर्वाधिक गोलकर्ता बनेका छन् । उनले हेनरी कामराको २९ गोलको कीर्तिमान तोड्दै आफ्नो नाममा लेखाएका हुन् । २०१२ देखि राष्ट्रिय टोलीमा रहेका मानेले ९० क्याप जित्दा ३२ गोल गरेका छन् ।
