एजेन्सी – युइएफए नेसन्स लिग ए ग्रुप ३ को पहिलो खेलमा इंग्ल्यान्ड स्तब्ध बनेको छ । इंग्ल्यान्ड घरेलु टोली हंगेरीसँग १–० ले स्तब्ध बनेको हो ।
बुढापेस्टमा शनिबार राति भएको खेलमा इंग्ल्यान्डलाई स्तब्ध पार्न घरेलु टोलीका डोमिनिक सोबोस्लाईले दोस्रो हाफमा पेनाल्टीमार्फत गरेको गोल नै निर्णायक बन्यो । उनले ६६औं मिनेटमा गोल गर्न सफल भएका थिए ।
खेलको सुरुवातदेखि नै घरेलु टोलीलाई दवावमा राखेको इंग्ल्यान्डले उनीहरुको बलियो रक्षापङ्तिलाई तोड्न सकेन । तेस्रो मिनेटमा एलेक्सान्डर आर्नाेल्डले आफ्नो पोजिसन गुमाएपनि एडाम सज्लाईको २० यार्ड टाढाको प्रहारलाई गोलरक्षक जोर्डन पिकफोर्डले बचाए ।
नवौं मिनेटमा इंग्ल्यान्डले अग्रता लिने सुवर्ण अवसर खेर फाल्यो । ५१औं मिनेटमा इंग्ल्यान्डले अर्काे खवसर खेर फाल्यो । ५९औं मिनेटमा जारोड बोवेनको हेडर सदुपयोग हुन नसक्दा इंग्ल्यान्ड अग्रता लिनबाट चुक्यो ।
६६औं मिनेटमा डोमिनिक सोबोस्लाईले पेनाल्टीमा गोल गर्दै टोलीलाई अग्रता दिलाए । रिस जेम्सले जिसोल्ट नागीलाई फउल गर्न पुगेपछि प्राप्त पेनाल्टीमा डोमिनिक सोबोस्लाई चुकेनन् । एक गोलले पछि परेको इंग्ल्यान्डले त्यसपछि लगातार आक्रमण बुनेपनि सफलता हात पार्न नसक्दा स्तब्ध बन्न पुग्यो ।
यो जितपछि हंगेरी लिग ए ग्रुप ३ मा ३ अंक जोडेर शीर्षस्थानमा रहेको छ । पराजित इंग्ल्यान्ड चौथो स्थानमा रहेको छ । समान एक अंक जोडेर जर्मनी र इटाली दोस्रो र तेस्रो स्थानमा रहेको छ ।
