एजेन्सी – रियल म्याड्रिडका अध्यक्ष फ्लोरेन्टिनो पेरेजले विश्वभरमा फुटबल फ्यानहरू रियलको मायामा परेको दावी गरेका छन्। रियल समर्थकहरुका लागि एक संदेश जारी गर्नेक्रममा पेरेजले यस्तो बताएका हुन्।
रियलको च्याम्पियन्स लिग सफलताले सबै फुटबल समर्थकहरु रियललाई माया गर्ने अवस्थामा पुगेको पेरेजको भनाई छ। जारी सन्देशमा पेरेजले सबै राम्रा फुटबल समर्थकहरु च्याम्पियन्स लिगमा रियलको सफलता देखेर मोहित भएको उल्लेख गरेका छन्।
“पेरिसमा हाम्रो टोलीले जितेको १४औं युरोपियन कपले रियल म्याड्रिडको इतिहासलाई अझ बलियो बनाएको छ। यो रोमाञ्चक समयमा पाएको आनन्द म सबै रियल समर्थकसँग साट्न चाहन्छु। यसपालिको युरोपियन कप अविस्मरणीय रहनेछ। यो रियललाई मन पराउने सबैको हृदय र सम्झनामा सधैंभरि रहनेछ। हामीले यसलाई प्राप्त गर्नको लागि तय गरेको यात्राले म्याड्रिडका फ्यानहरूलाई गर्व गर्ने राम्रो अवसर दिएको छ।”,पेरेजले जारी सन्देशमा भनेका छन्।
त्यस्तै रियल म्याड्रिडका धेरै खेलाडीले पाँचौ च्याम्पियन्स लिग जितेकोमा पनि पेरेजले खुशी व्यक्त गरेका छन्। रियलको टीमले हरेक खेलमा गरेको मिहिनेतका आधारमा च्याम्पियन्स लिग जित्न सकेको उनको भनाई छ। पेरेजले समर्थक बिना सफलता मिल्न नसक्ने कुरा बताउन पनि छुटाएका छैनन्।
उनले सन्देश मार्फत भनेका छन्,”हाम्रो टोलीले प्रत्येक खेलमा आफ्नो सबै कुरा दिएको छ। कार्लो एन्सेलोटी जस्ता प्रशिक्षकको नेतृत्वमा हामीले सफलता हाँसिल गर्दा उनले पनि इतिहास बनाए। हाम्रा खेलाडी मध्ये धेरैले पाँचौ पटक च्याम्पियन्स लिग जिते। तर जे होस्, यी सबै समर्थक बिना सम्भव थिएन।”
