एजेन्सी – खेलको अन्त्यतिर कप्तान ह्यारी केनले पेनाल्टीमार्फत गोल गरेपछि इंग्ल्यान्ड युइएफए नेसन्स लिग ए ग्रुप ३ को खेलमा हारबाट जोगिएको छ । इंग्ल्यान्डले जर्मनीसँग १–१ गोलको बराबरी खेलेको हो ।
एलिएन्ज एरिना म्युनिखमा मंगलबार राति भएको खेलमा घरेलु टोलीका लागि जोनास होफमानले गोल गरेका थिए । पाहुना टोलीलाई दवावमा राखेको जर्मनीले खेलको ५०औं मिनेटमा अग्रता लिएको थियो । जोनास होफमानले योसुवा किम्मिखको पासमा गोल गर्न सफल भएको थियो ।
तर, निर्धारित समयको अन्तिम दुई मिनेट सम्हालिन नसक्दा जर्मनी बराबरीमा रोकिन बाध्य बन्यो । ८८औं मिनेटमा कप्तान केनले गोल गर्दै इंग्ल्यान्डलाई हारबाट जोगाए । पेनाल्टी बक्समा केनलाई निको स्लटरबेकले फउल गरेपछि रेफ्रीले भिएआरको सहायता लिदै इंग्ल्यान्डलाई पेनाल्टी प्रदान गर्दा केन चुकेनन् ।
यो बराबरीसँगै इंग्ल्यान्डले समूहमा पहिलो अंक जोडेको छ । इंग्ल्यान्ड पहिलो खेलमा हंगेरीसँग पराजित भएको थियो । जर्मनीको यो लगातार दोस्रो बराबरी हो । यो नतिजापछि जर्मनी २ अंक जोडेर तेस्रो तथा इंग्ल्यान्ड १ अंक जोडेर पुछारमा छ । इटालीको ४ तथा हंगेरीको ३ अंक छ ।
