एजेन्सी – अर्जेन्टिनी स्टार फुटबलर लियोनेल मेस्सीको पारिश्रमिक सार्वजनिक भएको छ। बार्सिलोना बस्न असम्भव भएपछि फ्री ट्रान्सफरमा फ्रान्सेली क्लब पेरिस सेन्ट जर्मेन(पिएसजी) पुगेका मेस्सीको पारिश्रमिक फ्रान्सेली पत्रिकाहरुले सार्वजनिक गरेका हुन्।
सार्वजनिक तथ्यांकका अनुसार मेस्सीले पिएसजीमा प्रति हप्ता ५ लाख ७६ हजार युरो पारिश्रमिक पाउनेछन्। आउने दुई सिजन मेस्सीले ३० मिलियन युरोका दरले पारिश्रमिक पाउनेछन्। यदि मेस्सीले तेस्रो वर्ष पनि पिएसजीमा बस्न चाहेको खण्डमा थप १० मिलियन युरो पारिश्रमिक पाउनेछन्।
मेस्सीले पाउने पारिश्रमिक नेयमार बराबरकै हो। फरक यति हो कि मेस्सीको पारिश्रमिक बढ्दो क्रममा हुनेछ भने नेयमारको पारिश्रमिक घट्दो क्रममा हुनेछ। समय बित्दै जाँदा पारिश्रमिक घटाउने गरी पिएसजी र नेयमार बीच सन् २०२५ सम्मका लागि सम्झौता भएको फ्रान्सेली मिडियाहरु दावी गर्छन्।
मेस्सीले वार्षिक ३० मिलियन युरोका अलावा अन्य व्यक्तिगत तथा टीम बोनस पनि आर्जन गर्नेछ। उक्त बोनस के कति हुन्छ भन्ने भन्न गार्हो भन्छ। साथै मेस्सीले पिएसजीमा रहुनजेल नयाँ प्रायोजक क्रिप्टोकरेन्सी डट कमको बाट १ मिलियन युरो पनि प्राप्त गर्नेछन्।
पिएसजीले नयाँ प्रायोजकको रुपमा क्रिप्टोकरेन्सी डट कमको साथ मेस्सीको आगमन भएपछि पाएको हो। उक्त प्रयोजनले पिएसजीलाई एक सिजनमा २५ देखि ३० मिलियन सम्म फाइदा हुने बताइन्छ।
रोनाल्डो भन्दा बढी पारिश्रमिक
प्रिमियर लिगमा सबै भन्दा बढी पारिश्रमिक लिने रोनाल्डोले प्रति हप्ता ४ लाख ५० हजार युरो आसपास पारिश्रमिक पाइरहेका छन्। यस हिसाबले मेस्सी हप्तामै रोनाल्डोले भन्दा १ लाख २६ हजार युरो भन्दा बढी पारिश्रमिक पाउँछन्। रोनाल्डोले पाउने पारिश्रमिक मेस्सी भन्दा कम हो। रोनाल्डो युभेन्टसबाट म्यानचेस्टर युनाइटेड आउँदा पारिश्रमिक कटौती गर्न तयार भएका थिए। उनले ७ मिलियन युरो आसपासको पारिश्रमिक कटौती गरेको बताइन्छ।
