सिजनको शानदार सुरुवात गरेका लिभरपुलका फरवार्ड मोहम्मद सलाहले दर्शक र फुटबलरहरुबाट प्रशंसा कमाउने क्रम जारी छ। क्वीन्स पार्क रेंजर्स स्ट्राइकर चार्ली अस्टिन उत्कृष्ट लयमा रहेका इजिप्टियनको शानदार प्रदर्शनको तारिफ गर्ने अर्का खेलाडी रहेका छन्।
टकस्पोर्टसँगको एक अन्तर्वार्तामा चार्ली अस्टिनले दाबी गरे कि मोहम्मद सलाह अहिले युरोपका कुनै पनि टोलीको सुरुवाती ११ मा पर्ने खेलाडी हुन्। लिभरपुल विंगरको पीएसजीको स्टार स्टडेड आक्रमणमा प्रवेश गर्ने सम्भावनाको बारेमा प्रश्न गर्दा उनले नेयमारलाई बेन्चमा राखेर सलाहसँग सुरुवात गर्ने बताएका छन्।
“हरेक हप्ता उनले गोल गर्छन् नै भन्ने लाग्छ। उनी लिभरपुलका लागि अविश्वसनीय प्रदर्शन गर्दै आएका छन्। अहिलेको समयमा विश्व कै कुनै टोली छैन जुन टिममा सलाहले सुरुवात गर्दैनन्,” उनले भने।
लिभरपुलका लागि सिजनको सुरुवात निकै उत्कृष्ट गरेका पूर्व रोमा स्टारले सबै प्रतियोगितामा ८ गोल गरिसकेका छन्। उनले प्रिमियर लिगमा ५ गोल गर्दा च्याम्पियन्स लिगमा २ खेलमा ३ गोल गरेका छन्। उनी प्रिमियर लिगमा यो सिजन सर्वाधिक गोलकर्ताको सूचीमा पहिलो स्थानमा रहेका छन्। उनको उत्कृष्ट प्रदर्शनको मद्दतमा मर्सीसाइड क्लब प्रिमियर लिग र च्याम्पियन्स लिगको आफ्नो समूह दुबै प्रतियोगितामा शिर्ष स्थानमा रहेको छ।
तपाईंलाई ले लाग्छ पीएसजीमा सलाह भएको भए नेयमार भन्दा पहिला उनले सुरुवाती ११ मा स्थान पाउँथे होलान् त ?
