असार १५ काठमाडौँ , निर्माण घोषणा गरेदेखि नै चर्चामा रहेको चलचित्र ‘प्रेम गीत ३’ का लागि अन्तत अभिनेत्रीको फाइनल गरिएको छ। चलचित्रमा प्रेमको गीतको भूमिकामा क्रिष्टिना गुरुङलाइ छनौट गरिएको हो। गीत बन्नका लागि आवेदन दिएका २ हजार सात सय मध्येबाट उत्कृष्ट २५ मा पर्न सफल क्रिष्टिना अमेरिकाबाट चलचित्र प्रेम गीत ३ को अडिसनकै लागि आएकी हुन्। अभिनय क्षमता , हाईट ,लुक्स आदि सबैमा क्रिष्टिना गीतको क्यारेक्टरका लागि योग्य रहेकाले उनलाई नै चलचित्रमा गीतको लागि फाइनल गराईएको चलचित्रका निर्माता सन्तोष सेनले बताएका छन।
आसुशेन फिल्म्सको प्रस्तुतिमा निर्माण हुन लागेको चलचित्रका लागि प्रदीप खडका प्रेमको भूमिकामा पहिले नै अनुबन्धित भईसकेका थिए। उनका साथमा चलचित्रमा बालकलाकार अनुभव रेग्मी , शिव श्रेष्ठ , सुनिल श्रेष्ठ , स्वयं निर्माता सन्तोष सेन लगायतका कलाकारहरुको भूमिका रहने छ।
नयाँ बर्षको छेको पारेर अर्थात् चैत २८ बाट प्रदर्शन हुने तयारीमा रहेको चलचित्र ‘प्रेम गीत ३’ पहिलो र दोश्रो संस्करणभन्दा भिन्न र शशक्त हुने निर्माण टिमको दावी रहेको छ। छेतेन गुरुङ र मन्दिप गौतमको कथा रहने चलचित्रलाई छेतेन र सन्तोषले संयुक्त रुपमा निर्देशन गर्दै छन।
