एजेन्सी – बार्सिलोनाले गएको सिजन च्याम्पियन्स लिग उपाधि जित्न नसकेपनि टोलीका कप्तान कप्तान लियोनल मेस्सी युइएफए डट कम गोल अफ दि सिजन जित्न सफल भएका छन् ।
लिभरपुलविरुद्ध च्याम्पियन्स लिग सेमिफाइनलको पहिलो लेगमा मेस्सीले गरको गोल सिजनकै उत्कृष्ट बन्न सफल भयो । त्यो पहिलो लेगमा मेस्सीको बार्सिलोना ३–० ले विजयी भएको थियो । तर दोस्रो लेगमा नतिजा उल्टाउँदै अघि बढेको लिभरपुलले अन्ततः च्याम्प्यिन्स लिग उपाधि जितेको थियो ।
बार्सिलोनाका लागि त्यो खेलमा मेस्सीको त्यो दोस्रो र क्लबका लागि ६ सयौं गोल थियो । मेस्सीले सिजनको उत्कृष्ट गोलको अवार्ड जितेको यो तेस्रो पटक हो । गत सिजन रोनाल्डोले उक्त अवार्ड जितेका थिए ।
यसपटक मेस्सीले क्रिस्टियानो रोनाल्डोलाई पछि पार्दै अवार्ड जितेका हुन् । युभेन्ट्सका रोनाल्डोले म्यानचेस्टर युनाइटेडविरुद्ध समूह चरणमा भलीमार्फत गरेको गोल दोस्रो स्थानमा रह्यो । सर्बियाविरुद्ध युरोपियन छनोटमा पोर्चुगलका डानिलोले गरेको गोल सिजनको तेस्रो उत्कृष्ट गोल रह्यो ।
युइएफअन्तर्गत क्लब र अन्तर्राष्ट्रिय खेलका गोललाई मात्र उत्कृष्ट गोलमा मनोनयनमा पारिएको थियो । युईएफएको प्राविधिक टोली, पूर्व अन्तर्राष्ट्रिय खेलाडी र युईएफएका विशेषज्ञले अन्तिम १० उत्कृष्ट छनोट गरेको युइएफएको वेबसाइटमा उल्लेख छ ।
