काठमाडौँ असार २३ , चर्चित अभिनेता सौगात मल्ल र अभिनेत्री प्रियंका कार्कीद्वारा अभिनित चलचित्र फाटेको जुत्ता युट्युब को ट्रेंन्डीङ १ मा पर्न सफल भएको छ। दुइ वर्ष अगाडी प्रदर्शनमा आएको चलचित्रले हलमा खासै दर्शक तान्न नसके पनि युट्युबमा भने दर्शक तान्न सफल भएको छ।
गत शुक्रवार युट्युबमा सार्वजनिक गरिएको यस चलचित्रलाई युट्युबमा २२ लाख भन्दा बढी पटक हेरिएको छ भने २८ हजार भन्दा बढी लाइक आएको छ। चलचित्र समिक्षकद्वारा खासै राम्रो प्रतिक्रिया नपाएको फाटेको जुत्तालाई युट्युबमा पनि मिश्रित खालको प्रतिक्रिया मिलेको छ।
निकेश खडकाको निर्देशनमा तयार भएको चलचित्रमा सौगात मल्ल , प्रियंका कार्की , रबिन्द्र झा , अनोज पाण्डे लगायतका कलाकारको मुख्य भूमिका रहेको छ। चलचित्रमा दयाहांग राई र वर्षा राउतको पनि भूमिका रहेको छ। अर्जुन कुमार फिल्म्सको ब्यानरमा निर्माण भएको चलचित्रमा निरज कँडेलको छायांकन तथा दीर्घ गुरुङको सम्पादन रहेको छ ।
