नवनियुक्त संस्कृति, पर्यटन तथा नागरिक उड्डयनमन्त्री योगेश भट्टराईले मुलुकको इज्जत र जनताको अपेक्षा पूरा गर्नेतर्फ आफूले ध्यान केन्द्रित गर्ने बताउनुभएको छ ।
आज मन्त्रालयमा पदभार ग्रहणपछि आयोजित स्वागत समारोहमा मन्त्री भट्टराईले भन्नुभयो, “तपाईहरुले मलाई काम लगाउनुहुनेछ, कस्तो काम गर्दा मुलुकको इज्जत बढ्छ, प्रधानमन्त्रीले र जनताले सोचेको अपेक्षा पूरा हुन्छ, के गर्दा चुनौतीमाथि सफलता हासिल हुन्छ, भोलिका दिनमा विषयगत हिसाबले छलफल गरेर जानेछु ।”
केही दिनभित्रैमा प्रधानमन्त्रीसमक्ष मन्त्रीको हिसाबले कामको करार सम्झौता गर्ने उल्लेख गर्दै मन्त्री भट्टराईले भन्नुभयो, “हामी जे गर्न सक्छौँ, त्यो कुरा भन्छौँ, जे हुन सक्दैन, त्यो के कारणले भएन भनेर पारदर्शी ढङ्गले बताउने छौँ ।” निर्देशन कम हुने र सामूहिक निर्णयबाट अघि बढ्ने बताउँदै उहाँले प्रधानमन्त्रीले राखेको आशा र अपेक्षा पूरा गर्र्ने उल्लेख गर्नुभयो ।
कुनै पूर्वघोषित कार्यक्रम नभई परिस्थितिले आफू मन्त्री हुन आइपुगेको प्रष्ट्याउँदै उहाँले कसैलाई काम लगाउन होइन काम सिक्न आएको बताउनुभयो । राष्ट्रिय गौरवका आयोजनालाई समयमै सक्ने तथा सन् २०२० को नेपाल भ्रमण वर्ष साकार पार्ने मन्त्री भट्टराईले प्रतिबद्धता जनाउनुभयो ।
मुलुकलाई समृद्ध बनाउने राष्ट्रिय आकाङ्क्षा पूरा गर्न कुनै कसर बाँकी नराख्ने मन्त्री भट्टराईको भनाइ थियो । नेपाल वायुसेवा निगमको विश्वसनियता कायम गर्नेसमेत उहाँले प्रतिबद्धता जनाउनुभयो । सञ्चारमाध्यमलाई कुनै पनि बधाई नछाप्न अनुरोध गर्र्दै उहाँले मन्त्रीका रुपमा नियुक्तिका लागि सहयोग गर्ने पार्टीका नेतृत्वप्रति आभार प्रकट गर्नुभयो ।
अधिकारीको उत्तराधिकारी भएर आएको छु
मन्त्री भट्टराईले विसं २०७५ फागुन १५ गते तत्कालिन मन्त्री रवीन्द्र अधिकारीको दुःखद् निधनले असल युवा राजनीतिकर्मी र घनिष्ट मित्र गुमाएको स्मरण गर्नुभयो । उहाँले परिस्थिति र घटनाक्रमले अधिकारीको कुर्सीमा आफू आइपुगेको बताउनुभयो ।
“यो मन्त्रालयलाई उहाँकै नेतृत्व आवश्यक थियो, प्रधानमन्त्रीले सही चयन गर्नुभएको थियो, अफसोच प्रकृतिसँग हामीले जित्न सकेनौँ र उहाँलाई अल्पआयुमै गुमाउन पुग्यौँ, उहाँको एउटा उत्तराधिकारी जस्तो भएर म आएको छु, यसोभन्दा मलाई कुनै हिनताबोध छैन, गर्व छ”, मन्त्री भट्टराईले भन्नुभयो ।
अधिकारीले यो मन्त्रालयमा जे कदम उठाउनुभएको थियो, त्यो कामलाई आगामी दिनमा अझै माथि बढाउने विश्वास व्यक्त गर्दै उहाँले यसअघि जिम्मेवारी सम्हालिसक्नु भएकाको सल्लाह लिएर अघि बढ्ने प्रतिबद्धता व्यक्त गर्नुभयो ।
सञ्चारजगत्सँग सँगसँगै
मन्त्री भट्टराईले आफू सञ्चारजगत्सँग नभाग्ने प्रतिबद्धता जनाउनुभयो । सञ्चारजगत्बाट नभागी सँगसँगै अघि बढ्ने बताउँदै उहाँले आजको दिनमा मिडियाको भूमिका ठूलो रहेको उल्ल्ेख गर्नुभयो ।
देश बनाउने अभियानमा सञ्चारमाध्यामको सहयोगी भूमिका रहने उल्लेख गर्दै भन्नुभयो, “हामी तपाईहरुको निगारनीमा छौँ, म अपेक्षा गर्दछु कि देश बनाउने दायित्व प्रधानमन्त्रीको, मन्त्रीको, मन्त्रालयका सचिव या कर्मचारीको मात्रै होइन हामी सबैको हो, सञ्चारकर्मीको पनि हो ।” व्यक्तिगत र गोप्य कुराबाहेक पत्रकारका निम्ति मन्त्रालय सधँै खुला रहेकोसमेत उहाँले बताउनुभयो । आजको दुनियाँ पारदर्शी र जवाफदेही रहेको, संविधानतः प्रधानमन्त्री र संसद्प्रति एकसाथ जवाफदेही रहेकाले हर काम सहभागितामूलक हुने उहाँको भनाइ थियो ।
मन्त्रालयका काममा केही चुनौती रहेको बताउँदै मन्त्री भट्टराईले नेपाल भ्रमण वर्ष २०२० लाई सफल बनाएरै छाड्ने जिकिर गर्नुभयो ।
“सन् २०२० को जुन लक्ष्य छ, हामी पुग्छौँ, त्यसका निम्ति मन्त्रालयको सम्पूर्ण तागत र शक्तिका साथ अगाडि बढ्छौँ, कहाँकहाँ कमजोरी छ, त्यसलाई सच्याएर जान्छौँ”, मन्त्री भट्टराईले थप्नुभयो ।
उहाँले पोखरा अन्तर्राष्ट्रिय विमानस्थल, गौतमबुद्ध अन्तर्राष्ट्रिय विमानस्थल जस्ता गौरवका आयोजना सके समयभन्दा पहिले नै भएन भनेपनि तोकिएको समयभित्र सम्पन्न गरी आउने भ्रमण वर्षलाई सफल बनाउने गरी अघि बढ्ने बताउँदै भन्नुभयो, “प्रगति कहाँ पुगेको छ छलफल गर्छौं, सहमति जुटाउने प्रयास गर्छौं, भएका आशङ्का मेटाउने गरी सकेसम्म आउने कार्यकालमै सम्पन्न गर्नेछौँ ।” त्यो काम अति आवश्यक र निर्विकल्प रहेकोसमेत मन्त्री भट्टराईको भनाइ थियो ।
वाह १ नेपाल एयरलाइन्स भन्ने बनाउँछौंँ
नेपाल वायुसेवा निगममाथि टिप्पणी भइरहेको अवस्थामा त्यसको विश्वसनियतालाई माथि उठाउने प्रतिबद्धता जनाउँदै मन्त्री भट्टराईले भन्नुभयो, “वाह १ नेपाल एयरलाइन्स भन्ने बनाउने छौँ, त्यसका निम्ति छलफल अगाडि बढाउने छौँ ।” अन्य आन्तरिक विमानस्थलको सुदृढीकरण, विस्तार गरी निजी सहयोगी संस्थासँग हातेमालो गरेर अघि बढ्ने उहाँले उल्लेख गर्नुभयो ।
कार्यक्रममा संस्कृति, पर्यटन तथा नागरिक उड्डयन राज्यमन्त्री धनबहादुर बुढाले मन्त्री भट्टराईको आगमनले ‘समुद्ध नेपाल र सुखी नेपाली’ भन्ने मुलुकको राष्ट्रिय आकाङ्क्षा पूरा हुने विश्वास व्यक्त गर्नुभयो ।
मन्त्रालयका सचिव मोहनकृष्ण सापकोटाले मन्त्रीको कार्यकाल मन्त्रालयका लागि स्वर्णिम बन्ने उल्लेख गर्दै मुलुकको संस्कृति र अर्थतन्त्रमा निकै महत्व राख्ने मन्त्रालय भएको जानकारी गराउनुभयो ।
नेपालको अर्थतन्त्रको दोस्रो योगदानकर्ता क्षेत्रको रुपमा केही नयाँ नीति लिएर अघि बढेको भन्दै उहाँले नेपाली जनतालाई आर्थिक उपार्जन र रोजगारी सिर्जना गर्ने लक्ष्यकासाथ नीतिनियम सुधारको चरणमा र वायुसेवा निगमको कार्यक्षेत्र विस्तारको अभियानमा मन्त्रालय लागेको बताउनुभयो ।
