काठमाडौँ : काठमाडौंको बालुवाटारस्थित एक घरमा लागेको आगो नियन्त्रणमा आएको छ ।
बुधबार मध्याह्न बालुवाटारस्थित चिनियाँ एम्बेसीसँगैको सुविसुको मुख्य सर्भर रहेको भवनमा आगोलागी भएको हो ।
बालुवाटारमा रहेको चिनियाँ एम्बेसीसँगैको घरमा आगो लागेको सूचना प्राप्त भएपछि घटनास्थलमा प्रहरी परिचालन गरि दमकल बोलाएर आगो नियन्त्रणमा लिइएको महानगरीय प्रहरी परिसर काठमाडौंका डीएसपी होविन्द्र बोगटीले जानकारी दिए ।
उनका अनुसार जेनेरेटर सञ्चालनमा लागि आवश्यक इन्धन जम्मा गरेको कोठाबाट आगलागी सुरु भएको र पेट्रोलबाट लागेको आगो पानी हालेर निभाउन कठिन भएकाले समय लागेको हो ।
दिउँसो पौने १ बजेबाट सुरु भएको आगोलागी करिब डेढ घण्टापछि साढे २ बजे मात्र नियन्त्रणमा आएको डीएसपी बोगटीले बताए । उक्त घटनामा भएको क्षतिबारे अनुसन्धान भइरहेको छ ।
