डोटी – सुदूरपश्चिम प्रदेशका मुख्यमन्त्री त्रिलोचन भट्टले सरकार कोभिड–१९ को नियन्त्रण तथा रोकथामका लागि अहोरात्र खटिइरहेको बताए। राष्ट्रिय समाचार समिति(रासस)सँगको संवादमा मुख्यमन्त्री भट्टले कोरोना रोग नियन्त्रणका लागि प्रदेश सरकार आफ्नो सबै तह र तप्काबाट खटिइरहेको जानकारी दिए।
मन्त्री भट्टले भने, “कोरोना नियन्त्रण तथा रोकथामका लागि प्रदेश सरकार सबै तह र तप्काबाट लागिपरेको छ, यो साझा अभियान हो, सबैले जुट्नु जरुरी छ ।” कोरोना महामारीले सम्पन्न विश्वलाई नै सन्त्रासमा पारेका बेला हाम्रो जस्तो अल्पविकसित मुलुकको साधन स्रोतले भ्याएसम्म प्रदेश सरकार अटिइरहेको बताउनुहुँदै मुख्यमन्त्री भट्टले सङ्कटका बेला पक्ष विपक्षभन्दा पनि सबैले आआफ्नो जिम्मेवारी बोध गरी रोग नियन्त्रणमा लाग्नुपर्ने बताए।
उनले भने, “अन्य मुलुकभन्दा नेपालमा कोरोनाले कम क्षति भएको छ, अहिले आपसी विवाद गरेर लड्ने बेला होइन, हामीले कोरोनाविरुद्ध लड्नु छ ।” सुदूरपश्चिम प्रदेश कोभिड–१९ को उच्च जोखिम भएकाले सरकारले तीब्र गतिमा काम अगाडि बढाइरहेको उल्लेख गर्नुहुँदै उनले प्रदेश सरकारले थप पिसिआर मेसिन खरिद प्रक्रिया अगाडि बढाएको तथा क्वारेन्टिन पनि व्यवस्थित बनाउन प्रतिबद्ध रहेको जानकारीसमेत दिए ।
संवादकै क्रममा मन्त्री भट्टले प्रदेश सरकार कोरोना नियन्त्रणमा खटिइरहेका बेला अनावश्यक बखेडा निकालेर आन्दालन गर्नुको कुनै अर्थ नरहेकोसमेत उनले बताए। “कोरोनाविरुद्ध सिङगो सुदूरपश्चिम सरकार लडिरहेका बेला कामै भएन, सरकार सुतेर बसेको छ भन्ने जस्ता लालछना लगाउनु गलत हो ।”, उनले भने। मुलुक रोग र भोकबाट फसिरहेका बेला अनावश्यक बखेडा झिकेर आन्दोलन नगर्न तथा नगराउन उनले आन्दोलनरत पार्टीलाई आग्रहसमेत गरे।
