एजेन्सी – बलिउड अभिनेता सुशान्तसिंह राजपुत अप्रत्यासित अवसानका कारण अहिले पूरै बलिउड शोकमा छ। विश्वभर रहेका बलिउड अभिनेता सुशान्तसिंहका प्रशंसक अहिले दुख व्यक्त गरिरहेका छन्। उनीसँगै काम गरेका कलाकार देखि उनका शुभचिन्तक सुशान्तको अवसान प्रति विभिन्न प्रतिक्रिया जनाइरहेका छन्।
यसै बीच सुशान्तसिंह सँगै चलचित्र ‘छिछोरे’मा काम गरेकी श्रद्धा कपुरले सुशान्तको अप्रत्यासित अवसान प्रति दुख व्यक्त गरेकी छन्। सुशान्तको अवसान भएको ४ दिन पछि श्रद्धाले इन्स्टाग्राममा तस्विर सहित आफ्नो भावना पोखेकी छन्।
“जे भयो, त्यो स्वीकार्न गार्हो छ। सुशान्त जीवनमा शून्यता छाइरहेछ। सुशान्त मानवता, बुद्धिमत्ता, जिज्ञासु र जे कुरामा पनि सुन्दरता देख्ने शुद्ध व्यक्ति थियो। ऊ आफ्नै धुनमा नाच्थ्यो।”,श्रद्धाले इन्स्टाग्राममा लेखेकी छन्।
श्रद्धाले चलचित्र ‘छिछोरे’को छायाँकनको क्रममा सुशान्तसँग बिताएका पल पनि स्मरण गरेकी छन्। सुशान्तको घर पुगेर टेलिस्कोपमा चन्द्रमा हेरेको समेत स्मरण गर्दै श्रद्धाले उक्त पल आफू निशब्द भएको पनि बताएकी छन्।
प्रकृति, सङ्गीत अनि कवितामा रमाउने सुशान्त साना-साना कुरामा पनि मंत्रमुग्ध हुने गरेको उनी बताउँछिन्। सुशान्त वास्तवमै प्रतिभावान भएको उनको दावी छ। अन्त्यमा उनले सुशान्तलाई सदा सम्झिरहने पनि उल्लेख गरेकी छन्।
श्रद्धा र सुशान्तले चलचित्र ”छिछोरे’मा सँगै काम गरेका थिए। दुवैको जोडीलाई खुबै रुचाइएको थियो। असफलता र जिन्दगिको कथामा आधारित भएर बनाइएको उक्त चलचित्र हिट भएको थियो।
श्रद्धा सुशान्तको अन्त्येष्टि पनि सहभागी भएकी थिइन्।
