एजेन्सी – कप्तान सर्जियो रामोसले पेनाल्टीमा गोल गरेपछि स्पेनिस ला लिगा अन्तर्गत शुक्रबार भएको खेलमा अंक तालिकाको शीर्षस्थानमा रहेको रियल म्याड्रिडले गेटाफेलाई १-० ले पराजित गरेको छ ।
घरेलु मैदान अल्फ्रेडो डी स्टेफानो रंगशालामा भएको खेलमा रियल म्याड्रिडले गेटाफेलाई पराजित गर्न निकै मिहिनेत गर्नुपर्यो । पहिलो हाफको खेल गोलरहित बराबरीमा सकिएपछि गेटाफेले दोस्रो हाफमा पनि रक्षात्मक रणनीति अपनाएको थियो । खेल बराबरीतर्फ उन्मुख रहँदै गर्दा गेटाफेको डिफेन्सबाट गल्ति हुँदा रियलले अग्रता लिने अवसर प्राप्त गर्यो ।
७८ औं मिनेटमा म्याथिअस ओलिभिएराले ड्यानी कार्भाजललाई लडाएपछि रेफ्रीले पेनाल्टी दिएका थिए । उक्त पेनाल्टीको अवसरलाई रामोसले सदुपयोग गर्दै रियललाई अग्रता दिलाए । गोलरक्षक डेविड सोरियाले पेनाल्टीको दिशा ठम्याएपनि बल रोक्न भने सकेनन् । जारी सिजन रामोसले आफ्नो गोल संख्या ९ गोल पुर्याए ।
यस जितसँगै रियल म्याड्रिडले अंक तालिकामा दोस्रो स्थानको बार्सिलोनाभन्दा ४ अंकको स्पष्ट अग्रता कायम गरेको छ । रियलको ३३ खेलमा ७४ अंक छ । दोस्रो स्थानको बार्सिलोनाले समान खेलमा ७० अंक जोडेको छ ।
अर्को चरणमा बार्सिलोनाले भिल्लारियलको मैदानमा खेल्नेछ । शीर्षस्थानको रियल म्याड्रिडले एथलेटिक बिल्बाओको सामना गर्नेछ ।
