एजेन्सी – ला लिगा च्याम्पियन रियल म्याड्रिडमा करिम बेन्जेमा टोलीका मुख्य फरवार्ड हुन् । १२ वर्षयता बेन्जेमा टोलीको हिस्सा रहँदै आएका छन् । क्रिस्टियानो रोनाल्डोले रियल छाडेर गएयता फरवार्डको मुख्य जिम्मेवारी बेन्जेमाकै काँधमा रहँदै आएको छ ।
यो सिजन रियलले नयाँ खेलाडी भित्राएन । त्यसका वावजुद भविष्यका लागि रियलले केहि खेलाडीमा चासो राखेको बताइन्छ । त्यस्तै बेन्जेमाको विकल्पका रुपमा बोरुसिया डर्टमन्डका फरवार्ड इर्लिङ हालान्डलाई हेरिएको छ ।
रियलका प्रशिक्षक जिनेदिन जिदानले पनि त्यसलाई सिधै त होइन, घुमाउरो रुपमा स्वीकार गरेका छन् । हालान्ड र रियलका प्लेमेरका मार्टिन ओडेगार्डले केहि दिन अघि नर्वेका लागि खेलेका थिए । नर्वेका लागि त्यो जोडीले उत्कृष्ट प्रदर्शन गरेको थियो ।
‘४–४–२ को प्रणालीमा मार्टिनले केहि फरक ढंगले खेले ,’ शुक्रबार प्रि म्याच कन्फ्रेसनमा जिदानले भने, ‘हालान्ड मेरो खेलाडी होइनन् । तर म यति भन्न सक्छु उनी राम्रो खेलाडी हुन् ।’
बोर्जा मायोरललाई जिदान रियलमै राख्न चाहन्थे भने लुका जोभिचलाई लोनमा पठाउन चाहन्थे । तर भयो उल्टो मायोराल रोमा पुगे भने जोभिच क्लबमै रहे । जिदानले खेलाडीहरुसँगको कुराकानी व्यक्तिगत भएको प्रष्ट पारेका छन् ।
‘म आफ्ना खेलाडी सँग कुरा गर्छु । तर ती सबै कुरा म सार्वजनिक गर्दिन, ‘उनले भने, ‘म यसमा इमान्दार रहन्छु । हरेक विषयमा सबैका आ आफ्नो धारणा हुन्छ ।’
फ्रान्सका युवा खेलाडी केलियन एमबाप्पले अन्तर्राष्ट्रिय विश्रामका दौरान रियलका महान खेलाडी रोनाल्डो र लुका माड्रिचको तारिफ गरेका थिए । पेरिस सेन्ट जर्मेन (पिएसजी) बाट ठूलो रकममा उनी भविष्यमा रियल जाने सम्भावना रहेको अनुमान गरिन्छ । तर, त्यो चर्चाले अहिले रियलमा प्रभाव नपर्ने जिदानले बताएका छन् ।
‘यस्तो भइरहन्छ । एमबाप्पेका विषयमा मात्र होइन तर फुटबलमा विभिन्न खाले हल्ला चलिरहन्छ ,’ जिदानले थपे, ‘त्यो चर्चाले हामीलाई असर गर्दैछ । तर अहिले बजार बन्द भइसकेको छ । रियलले शनिबार काडिजसँग खेल्दैछ ।’
