एजेन्सी – क्याटलान क्लब बार्सिलोनाका डिफेन्डर जेरार्ड पिके स्पष्ट वक्ताका रुपमा चिनिन्छन् । उनको अभिव्यक्तिकै कारण कतिपय अवस्थामा उनी विवादमा पनि आउने गरेका छन् ।
पछिल्लो पटक उनले बार्सिलोनाको अध्यक्ष बन्ने आफ्नो सपना रहेको बताएका छन् । क्रिस फाउन्डेसनले आयोजना गरेको एक अन्तरक्रिया कार्यक्रममा बोल्दै पिकेले यस्तो अभिव्यक्ति दिएका हुन् । क्यान्सरलाई पराजित गरेकाहरुले स्पेनिस संचारमाध्यम मार्सासँगको सहकार्यमा पिकेसँग अन्तरक्रिया गरेका थिए ।
म्याटियो : बार्सिलोनाको अध्यक्षमा दावेदारी दिनुहुन्छ ?
पिके : अहिले नै हुने चुनावमा त पाउँदिन । म अहिले खेलाडी छु र खेलाडी हुँदाहुँदै उठ्न पाइन्न । तर भविष्यमा भन्न सक्दिन । म बार्सिलोनाको ठूलो समर्थक हुँ । म क्लबलाई सहयोग गर्न चाहन्छु र त्यहाँ पुग्दा सबै कुरा बुझ्न चाहन्छु । अहिले पनि म त्यसैको तयारी गरिरहेको बुझ्न सकिन्छ । म त्यसको लागि ठिक भएपछि मात्र दावेदार दिन्छु । अध्यक्ष हुनु मेरो सपना हो तर अहिले नै भन्न सक्दिन ।
जेमी : सुआरेजले छोड्दा दुख लाग्यो?
पिके : लाग्यो । हामीले लामो समय सँगै खेल्यौ र खुसीको क्षण साट्यौं । सहकर्मीसँग बाहिर हेर्दा मैदानमा ९० मिनेट देखिएपनि हामीले धेरै समय सँगै बिताउँछौं । स्कुलमा विद्यार्थीजस्तै सधैं देखेको भेटेको, घुम्न गएको लगायत थुप्रै समय सँगै बिताएको हुन्छ ।
म्याटियो : तपाईंको सबैभन्दा मिल्ने साथी को हो ?
पिके : पुयोल हुँदा उनीसँग निकै मिल्थे । अहिले पनि राम्रो सम्बन्ध छ तर उनले सन्न्यास लिइसके । फाब्रिगाससँग पनि मेरो राम्रो सम्बन्ध थियो । हामीले एकेडेमीमा ८ वर्षको उमेरदेखि सँगै खेल्यौं । पछि उनी बार्सिलोना फर्किए र राष्ट्रिय टोलीमा पनि सँगै थियौं ।
अहिले क्लबमा भने ५-६ जना घरेलु खेलाडीको एउटा समूह छ । सर्जी, बुस्केट्स, एलेना र लिओ हामी लामो समयदेखि सँगै छौ । त्यसैले पनि हामीबीच राम्रो सम्बन्ध छ र धेरै समय सँगै हुन्छौं ।
जेमी : तपाईंको उत्कृष्ट गोल कुन हो ?
पिके : मैले इन्टर मिलानविरुद्ध गरेको गोल एकदम मनपरेको छ । मैले गोलरक्षक र डिफेन्डरलाई नै बिट गर्न सकें । गोलको महत्त्व हेर्दा भने बर्नाबाउको गोललाई मान्छु । उक्त खेलमा हामीले ६-२ को जित हासिल गर्यौं । इतिहास रचेको उक्त खेलमा मैले पनि गोल गर्न सकें ।
म्याटियो : तपाईंको करिअरमा सबैभन्दा खराब चोट कहिले थियो ?
पिके : सन् २०१४ को च्याम्पियन्स लिगमा एटलेटिकोविरुद्ध खेल्दा डिएगो कोस्टासँग हेडरमा जुध्ने बेलामा ल्यान्ड गर्दा तिघ्राको पछिल्लो भागमा चोट लागेको थियो । त्यो चोट लागेको रात म हिड्न पनि सकेको थिइनँ । त्यो दिन सोफामा नै सुतेको मलाई चल्न पनि निकै गाह्रो भएको थियो । त्यस चोटले म २-३ महिना मैदानबाहिर रहे । अहिले पनि सुत्दा अर्को तर्फ फर्केर सुत्नुपर्छ ।
