एजेन्सी – नयाँ प्रशिक्षक माउरिसियो पोचिटिनोले भविष्यमा क्लबमा भित्राउन सक्ने खेलाडीका बारेमा चर्चा गरेपछि पेरिस सेन्ट जर्मेन (पिएसजी) ले पनि त्यसमा ध्यान दिन थालेको छ ।
त्यसैकारण पिएसजीका खेलकुद निर्देशक लियोनार्दोले लिओनल मेस्सी उपलब्ध भएको खण्डमा क्लबले भित्राउन प्रयास गर्ने स्वीकारेका छन् । बार्सिलोनामा मेस्सीको सम्झौता यसै वर्षको जुन ३० मा सकिँदैछ । गत सिजन मेस्सीले अन्य क्लबमा जानका लागि बार्सिलोनाको व्यवस्थापनलाई पत्र नै लेखेका थिए ।
पछि क्लबसँग थप विवाद गर्न नचाहेको भन्दै सम्झौता अवधिभर बस्ने निर्णय गरेका थिए । जनवरीको सरुवा बजार खुलेसँगै मेस्सी जुनसुकै क्लबसँग छलफलका लागि उपलब्ध छन् । कतिपयले उनी फ्रि ट्रान्सफरपछि मात्र अन्य क्लब जान तयार हुने अनुमान गरिएको छ ।
‘उत्कृष्ट खेलाडी जोकोहि पिएसजीको सुचिमा हुनेछन्, जस्तै मेस्सी । तर यो अहिले यो विषयमा बोल्नु र सोच्नु सहि समय होइन,’ लियोनार्दोले भने,’ हामी यो विषयमा छलफल गर्नेछौं । अझै यो सिजन चार महिना बाँकी छ । यो उमेर र अवस्था पनि विचार गर्नुपर्ने हुन्छ । तर, पनि हाम्रो टेबलमा कुर्सी रहनेछ ।’
बार्सिलोनाले अहिलेसम्म नयाँ सम्झौताका लागि मेस्सीसँग छलफल गरेको छैन । कारण बार्सिलोनाको अध्यक्षका लागि मार्च ७ मा निर्वाचन हुँदैछ । त्यतिबेला सम्म छलफल हुने सम्भावना कम छ । मेस्सीलाई भित्राउनका लागि आर्थिक कारण मुख्य हुन सक्दछ । यदि मेस्सी पिएसजी पुगे भने फेरि एकपटक उनलाई र नेयमारलाईसँगै मैदानमा देख्न सकिनेछ ।
