बाएर लिभरकुजेनका स्टार लियोन बेलीका अनुसार बार्सिलोनाका कप्तान लियोनल मेस्सी पोर्चुगिज दिग्गज क्रिस्टियानो रोनाल्डोको स्तरमा कहिले पनि पुग्न सक्दैनन्। बेलीको नजरमा यी दुई फुटबलका दिग्गजले आफ्नो खेल जीवनमा जे-जे सफलता हाँसिल गरेका छन्, त्यो दृष्टिकोणबाट हेर्ने हो भने रोनाल्डोसँग मेस्सीको तुलना नै गर्न मिल्दैन।
बेलीको दृष्टिकोणमा रोनाल्डो आफ्नो प्रतिद्वन्द्वीभन्दा माथि हुनुको कारण निकै सरल छ: मेस्सीले बार्सिलोनामा मात्र आआफ्नो खेल जीवन बिताएका छन् र आफुलाई कहिल्यै विभिन्न टोली वा अन्य लिगमा प्रमाणित गरेका छैनन्।
“मलाई लाग्छ कि उनी [मेस्सी] धेरै समयदेखि एउटै मात्र क्लबमा छन्,” बेलीले ईएसपीएनलाई भने, “क्रिस्टियानो रोनाल्डो र मेस्सीबीचको ठूलो भिन्नता भनेको क्रिस्टियानो रोनाल्डोले विभिन्न टोलीमा शानदार प्रदर्शन गरेका छन् र यही कारणले उनी मेस्सी भन्दा उत्कृष्ट छन्।”
मेस्सी र रोनाल्डो दुबै फुटबल इतिहासकै महान खेलाडी भएपनि आफ्नो रोजाईमा सधैं रोनाल्डो नै पर्ने उनलको भनाइ छ। युभेन्टस स्टार रोनाल्डो भन्दा मेस्सी उत्कृष्ट क्षमता छ भन्ने उनको विश्वास रहेपनि उनको नजरमा रोनाल्डो मेस्सीभन्दा धेरै सफल छन्।
“मलाई विश्वास छ कि क्रिस्टियानो भन्दा प्रतिभाको कुरा आउँदा मेस्सी धेरै नै प्रतिभाशाली छन्,” बेलीले भने, “तर जब सफलताको कुरा आउँछ म १०० प्रतिशत रोनाल्डोलाई रोज्छु।”
सफलताको कुरा गर्दा रोनाल्डोले मेस्सी (४) को भन्दा एक बढी अर्थात् ५ च्याम्पियन्स लिग जितेका छन्। लिगको कुरा गर्नु पर्दा मेस्सीले रोनाल्डोको तुलनामा धेरै उपाधि जितेका छन्। मेस्सीले १० लिग उपाधि जितेका छन् भने रोनाल्डोको नाममा ७ लिग उपाधि छ। मेस्सीले आफ्ना सबै उपाधि बार्सिलोनासँग जितेका हुन् भने रोनाल्डोले फरक-फरक तीन क्लबका साथ जितेका छन्: म्यानचेस्टर युनाइटेडसँग प्रिमियर लिग, रियल म्याड्रिडका साथमा लालिगा र युभेन्टसबाट खेल्दा सरी-ए।
व्यक्तिगत अवार्डको कुरा गर्दा मेस्सी (६) र रोनाल्डो(५) ले जितेका ब्यालुन डी ओर सायदै अरु कुनै खेलाडीले जित्न सक्नेछन्।
