एजेन्सी – इंग्लिस प्रिमियर लिगमा आज (आइतबार) राति विभिन्न चार खेलमा प्रतिस्पर्धा हुदा लिभरपुलले घरेलु मैदानमा साविकको विजेता म्यानचेस्टर सिटीको आतिथ्यता गर्दैछ ।
खेल एनफिल्डमा नेपाली समयअनुसार राति ९:१५ बजे हुनेछ । घरेलु मैदानमा हुने खेलमा अपराजित लिभरपुल सिटीलाई हराउँदै शीर्षस्थानमा उक्लने लक्ष्यमा हुनेछ । सिटीलाई हराउन सके लिभरपुलले चेल्सीलाई पछि पार्दै शीर्ष स्थानमा उक्लनेछ । बराबरी या हारले लिभरपुलले शीर्षस्थानमा उक्लने मौका गुमाउनेछ ।
टोलीसँग मोहम्मद सलाह, साडियो माने, रोबर्टाे फिर्मिनो, कर्टिस जोन्स, फाविन्हो, जोर्डन हेन्डरसन, एन्ड्रिउ रोबर्टसन, भर्जिल भान डाइक, जोएल मटिप, जेम्स मिल्नर र गोलरक्षक एलिसन बेकर रहेका छन् । यस्तै डिएगो जोटा, ताकुमी मिनामिनो, एलेक्स अक्सलेड चेम्वरलेन र डिभोक ओरिगी पनि टोलीमा छन् ।
यता, म्यानचेस्टर सिटी पनि घरेलु टोलीलाई हराउँदै शीर्षस्थानको चेल्सीसँग अंक बराबरी गर्ने लक्ष्यमा हुनेछ । लिभरपुललाई हराउन सके सिटीले चेल्सीसँग अंक बराबरी (१६) गर्नेछ । बराबरी या हारले सिटीले शीर्षस्थानको चेल्सीसँगको अंक दुरी छोट्याउने अवसर गुमाउनेछ ।
टोलीसँग फिल फोडेन, ज्याक ग्रेलिस, केभिन डि ब्रुयन, गाब्रियल जेसस, बर्नाडो सिल्भा, रोड्री, जोओ क्यान्सेलो, एमेरिक लापोर्टा, रुवेन डियास, केल वाल्कर र गोलरक्षक इडर्सन मोराएस रहेका छन् । रहिम स्टर्लिङ, रियाद महारेज, फेरान टोरेस र फर्नान्डिन्हो पनि टोलीमा रहेका छन् ।
यि दुई टोलीबीचको पछिल्लो ३० भेटमा लिभरपुल १२ खेलमा विजयी भएको छ । ८ खेल सिटीले आफ्नो पक्षमा पार्दा १० खेल बराबरीमा सकिएको छ । पछिल्लो तीन भेटमा लिभरपुलले सिटीलाई हराउन सकेको छैन । जसमा १ बराबरी र दुई हारको नतिजा रहेको छ ।
लिभरपुल सिटीसँगको पछिल्लो जितविहीन यात्रालाई टुंग्याउने लक्ष्यमा रहँदा सिटी लिभरपुलसँगको अपराजित यात्रालाई निरन्तरता दिने योजनामा रहनेछ ।
कुन च्यानलमा हेर्ने ?
प्रिमियर लिगका खेलहरु कुनै पनि नेपाली च्यानलले प्रशारण गर्दैनन्। सिटी र लिभरपुल बीच हुने खेल भारतीय च्यानल स्टार स्पोर्ट्स सेलेक्ट २ मा हेर्न सकिनेछ।
