एजेन्सी – प्रिमियर लिगमा आज लिभरपुलले गएको ८ खेल देखि अपराजित आर्सनलको सामना गर्दैछ। सिजनको शुरुवातबाट अपराजित रहेर पछिल्लो खेलमा हार बेहोरेको लिभरपुलले घरेलु मैदानमा आर्सनलको सामना गर्न लागेको हो। खेल लिभरपुलको घरेलुमैदान एनफिल्डमा नेपाली समय अनुसार ११ बजेर १५ मिनेटमा शुरु हुनेछ।
प्रिमियर लिगको चौंथो र पाँचौं स्थानमा रहेका आर्सनल र लिभरपुल बीच हुने खेल निकै नै प्रतिष्पर्धात्मक हुने अनुमान गर्न सकिन्छ। दुवै टोली जितको खोजिमा हुनेछन्। आर्सनल म्यानचेस्टर सिटीसँग ५-० को गोल अन्तरले पराजित भएपछि हारेको छैन। त्यसपश्चात ८ खेल खेल्दा आर्सनलले ६ खेलमा जित निकालेको छ भने बाँकी २ खेलमा बराबरी खेलेको छ। आर्सनलले पछिल्ला तीन खेलमा लगातार जित निकालेको छ।
त्यस्तै लिभरपुलले पनि जारी सिजनमा बलियो प्रदर्शन गरिरहेको छ। तर लिभरपुल पछिल्लो खेलमा वेस्ट ह्याम विरुद्धको खेलमा भने पराजित भएको थियो। लिभरपुलले नयाँ सिजनको आक्रामक शुरुवात गरेपनि पछिल्ला दुई खेलमा पनि सन्तोषजनक प्रदर्शन गर्न सकेको छैन।
आर्सनल अहिले २० अंक सहित प्रिमियरल लिगको पाँचौं स्थानमा छ भने लिभरपुल २२ अंक सहित चौंथो स्थानमा रहेको छ। आज लिभरपुललाई हराउन सकेको खण्डमा आर्सनल शिर्ष चारमा अटाउनेछ भने लिभरपुल शिर्ष चारबाट बाहिरिने छ।
कुन च्यानलमा हेर्ने ?
आर्सनल र लिभरपुल बीच हुने खेल कुनै पनि नेपाली च्यानलले प्रशारण गर्ने छैनन्। यी दुई बीचको खेल हेर्नको लागि भारतीय च्यानलको भर पर्नुपर्नेछ। खेल स्टार स्पोर्ट्स ३ मा हेर्न सकिनेछ।
