पूर्व प्रिमियर लिग स्ट्राइकर क्रिस सट्टनले क्रिस्टियानो रोनाल्डो म्यानचेस्टर युनाइटेडमा राल्फ रङ्गनिकको खेल शैलीमा फिट नहुने महसुस गरेका छन्। रेड डेभिल्सले सोमबार राति रङ्गनिकको नेतृत्वमा पहिलो हार बेहोर्ने क्रममा वुल्भ्ससँग १-० ले पराजित भयो।
म्यानचेस्टर युनाइटेडले मिडफिल्ड क्षेत्रमा नियन्त्रण गर्न असफल र पर्याप्त गोलका अवसर सिर्जना गर्न नसक्दा वुल्भ्सले खेल पूर्ण रूपमा आफ्नो पक्षमा पार्न सफल भयो। पोर्चुगिज स्टार खेलाडीको बाहुल्यता रहेको वुल्भ्स विरुद्ध खासै राम्रो प्रदर्शन गर्न नसकेपछि रोनाल्डोको निकै आलोचना भएको छ।
सट्टनका अनुसार रोनाल्डोले समय समयमा मात्र विपक्षी खेलाडीलाई दबाब दिएको झलक देखाउँछन् जुन रङ्गनिकको प्रेसिंग शैलीको लागि उपयुक्त छैन। “क्रिस्टियानो रोनाल्डो एक आकर्षक विषय बनेको छ। मैले सिजनको सुरुदेखि नै भनेको थिएँ, जब ओले गुन्नार सोल्स्कजायर इन्चार्ज थिए, उनी ९० मिनेट दबाब दिने खेलाडी होइनन्। उनले ठूला पलहरूको लागि आफ्नो ऊर्जा बचत गर्न रुचाउँछन्, त्यसैले रङ्गनिक जस्ता प्रबन्धकहरूलाई रोनाल्डो जस्तो अहंकार भएको खेलाडीलाई आफ्नो शैलीमा खेल्न मनाउन सजिलो छैन,” उनले भने।
क्लबमा रोनाल्डोको प्रभाव खासै उत्कृष्ट नरहेको भन्दै उनले भने, “अहिले पनि पछि पनि रोनाल्डो विपक्षी खेलाडीको खुट्टाबाट बल खोज्न दबाब दिनेछन्, तर यसको बेला बेला झलक मात्र देखिन्छ। गत सिजन १९ खेलपछि युनाइटेड ४० अंकसहित शीर्ष स्थानमा थियो। यस सिजन रोनाल्डो, सान्चो र राफेल भारानलाई अनुबन्ध गरे पनि ३१ अंकका साथ सातौं स्थानमा छन्। रङ्गनिकले टोलीको लागि के राम्रो छ भनेर विचार गर्न आवश्यक छ। त्यसको लागि रोनाल्डोको स्थानमा अन्य खेलाडीलाई खेलाउन परे पनि गर्नुहोस्।”
