काठमाडौं । प्रधानमन्त्री तथा कांग्रेस सभापति शेरबहादुर देउवाले अमेरिकी सहयोग परियोजना एमसीसी अब पास हुने दाबी गरेका छन्। आइतबार प्रतिनिधिसभाको बैठकमा एमसीसी सम्झौता टेबल भएपछि सञ्चारकर्मीहरुलाई प्रतिक्रिया दिँदै देउवाले अब एमसीसी पारित हुने बताएका हुन्।
आइतबार बसेको प्रतिनिधिसभाको बैठक आउँदो बिहिबार बस्ने निर्णयसँगै स्थगित भएपछि संसदबाट बाहिर निस्कने क्रममा सञ्चारकर्मीहरुले प्रधानमन्त्रीलाई एमसीसी कहिले पास हुन्छ भनी प्रश्न गरेका थिए। सञ्चारकर्मीहरुले गरेको उक्त प्रश्नको जवाफमा देउवाले भने, “अब पास हुन्छ।”
प्रतिनिधिसभाको आइतबारको बैठकमा अर्थ मन्त्री जनार्दन शर्माको तर्फबाट सञ्चार तथा सूचना प्रविधि मन्त्री ज्ञानेन्द्रबहादुर कार्कीले एमसीसी सम्झौता पेश गरका थिए।
एमसीसीले गर्दा सिंगो नेपाल नै विभाजित भयो: नेता खनाल
काठमाडौँ — नेकपा एकीकृत समाजवादी पार्टी नेता झलनाथ खनालले अमेरिकाको दबाबको कारणले गर्दा एकजुट रहेको नेपाल विभाजित भएको दाबी गरेका छन्।
सरकारले आज संसद्मा एमसीसी टेबुल गरेपछि सञ्चारकर्मीहरुसँग कुरा गर्दै नेता खनालले अमेरिकाको दबाबले सिंगो देश नै विभाजित हुनु परेको बताएका हुन्। खनालले एक आर्थिक सम्झौतालाई लिएर सिंगो देश र संसदलाई नै विभाजित बनाएको भन्दै चिन्ता व्यक्त गरे।
नेता खनालले आफ्नो पार्टीमा एमसीसी सम्झौता संसदमा टेबल गर्न दिने विषयमा निर्णय हुँदै नभएको पनि दाबी गर्दै आफू सरकारमा बस्ने/नबस्ने सम्बन्धमा पार्टीको बैठकले निर्णय गर्ने बताए।
यसैबीच, एमसीसी टेलब गरेपछि आजको प्रतिनिधिसभाको बैठक स्थगित भएको छ। बैठकमा अर्थ मन्त्री जनार्दन शर्माको तर्फबाट सञ्चार तथा सूचना प्रविधि मन्त्री ज्ञानेन्द्रबहादुर कार्कीले एमसीसी सम्झौता पेश गरका थिए। संसदमा यस सम्झौता पेश गर्दै सञ्चारमन्त्री कार्कीले एमसीसी कार्यान्वयन भएको खण्डमा नेपालमा चार सय केभी क्षमताको तीन सय किलोमिटर लामो प्रसारण लाइन बन्ने, विद्युत् सेवाको विस्तार र अन्तर्राष्ट्रिय बजार पाउने उल्लेख गरेका थिए।
जसपछि संसदको अर्को बैठक फागुन १२ गते बिहिबार बस्ने सभामुख अग्नि सापकोटाले जानकारी दिए।
