ट्राइ-सिरिजको फाइनलमा आज नेपालले पपुवा न्युगिनीसँग खेल्दै, यसरी हेर्नुहोस् लाइभ खेल !

काठमाडौं – नेपालले त्रिकोणात्मक टि२० आई सिरिजको फाइनलमा आज पपुवा न्युगिनी (पीएनजी) सँग खेल्दैछ । खेल दिउँसो १२ः३० मा टियु क्रिकेट मैदान सुरुहुनेछ । नेपाल अपराजित रहँदै उपाधि जित्ने सोचमा हुनेछ । नेपाल घरेलु मैदानमा लगातार दोस्रो त्रिकोणात्मक टि२० आई सिरिज उपाधि जित्न चाहन्छ ।

नेपालले पीएनजीलाई लिगमा १५ रन र ३७ रनले पराजित गरेको थियो । नेपालले लिगको अन्तिम खेलमा मलेसियालाई ८५ रनले हराएको थियो । उक्त खेलमा दीपेन्द्रसिंह ऐरीले चौथो नम्बरमा ब्याटिङ गर्दै १ सय ५ रनको शतकीय इनिङ खेलेका थिए ।

दीपेन्द्र नेपालका प्रमुख हतियार हुन् । ब्याटिङ र बलिङ दुबैमा उत्कृष्ट प्रदर्शन गर्दै आएका छन् । नेपालले आजको खेलमा ब्याटिङमा कुनैपनि परिवर्तन गर्ने सम्भावना छैन । शीर्ष चार ब्याटरको विकल्प खोज्न आवश्यक छैन ।

ओपनरमा आसिफ शेख र कुशल भुर्तेल हुनेछन् । यी दुबै ब्याटर सुरुवात राम्रो गरेपनि ठूलो इनिङ खेल्न सकेका छैनन् । आक्रामक सुरुवातसँगै नेपाल ओपनरबाट ठूलो योगफलको आधार तय गर्न चाहन्छ । रोहित पौडेल तेस्रो र दीपेन्द्रसिंह ऐरी चौथो नम्बरमा हुनेछन् । यी दुबै ब्याटर उच्च लयमा छन् ।

मलेसियाविरुद्ध रोहितले टि२० आई करिअरको पहिलो अर्धशतक प्रहार गरेका थिए । साझेदारी पनि यी दुई ब्याटरबीच जम्दै आएका छन् । दीपेन्द्र र रोहितको प्रदर्शन नेपालको लागि महत्वपूर्ण हुनेछ ।

पाँचौं नम्बरमा नेपालले आरिफ शेखलाईनै निरन्तरता दिनेछ । आरिफ अनुभवीसँगै मध्यगतिका पार्टटाइम विकल्प हुन् । आरिफको स्थानमा विवेक यादव थप प्रभावकारी हुनसक्छन् । तर चारै खेलमा नेपालले विवेकलाई मौका दिएको थिएन । फाइनलमा सिधैं मौका दिने सम्भावना पनि देखिदैन ।

आदिल अन्सारी, दीलिप नाथ, करण केसी र सोमपाल कामी रहनेछन् । आदिल आक्रामक ब्याटिङको क्षमता राख्छन् । उनले डेब्यू खेलमा पीएनजीविरुद्ध ११ बलमा ३१ रनको इनिङ खेलेका थिए । करण र सोमपालले पनि अन्तिममा त्यतिनै राम्रो ब्याटिङ गर्दछन् ।

नेपालले मलेसियासँगको खेलमा तीव्र गतिका बलर सोमपाल कामीलाई विश्राम दिएको थियो । दुर्भाग्यपूर्ण उनको स्थानमा खेलेका कमलसिंह ऐरीको बायाँ हातको कुमको हड्डी भाचिन पुगेको थियो । नेपालले कमलको स्थानमा सोमपाललाई फर्काउने छ । अन्य परिवर्तन टोलीमा देखिदैन ।

सोमपाल, करण र अभिनाश बोहरा तीव्र गतिका बलिङ हतियार हुन् । पार्टटाइममा आदिल र आरिफले साथ दिनेछन् । स्पिनरमा सन्दीप लामिछाने हुनेछन् । सन्दीपलाई दीपेन्द्रसिंह ऐरीले साथ दिनेछन् । तुलनात्मक रुपमा स्पिन आक्रामण केहि कमजोर देखिन्छ । सन्दीप, दीपेन्द्र र करण नेपालका प्रमुख हतियार हुन् । यी तीन खेलाडीको प्रदर्शनले नतिजा धेरै प्रभाव पार्ने देखिन्छ ।

नेपालको सम्भावित प्लेइङ ११ :

कुशल भुर्तेल, आसिफ शेख, रोहित पौडेल, दीपेन्द्रसिंह ऐरी, आरिफ शेख, आदिल अन्सारी, दीलिप नाथ, करण केसी, सोमपाल कामी, अभिनाश बोहरा र सन्दीप लामिछाने (कप्तान)

कसरी हेर्ने लाइभ खेल ? 

नेपाल र पपुवा न्युगिनी (पीएनजी) बीचको फाइनल खेल नेपाली समय अनुसार १२:३० बाट कान्तिपुर एचडी च्यानलका साथै कान्तिपुरको युट्युब च्यानलबाट पनि प्रत्यक्ष प्रशारण हेर्न सकिन्छ।

प्रकाशित : सोमबार, चैत २१, २०७८१०:२३

सुरु भयो बार्सिलोनाको मिसन लेवान्डोस्की, महत्वपूर्ण डिफेन्डर नै दिएर ल्याउने भयो !