एजेन्सी – बलिउड अभिनेता रणवीर कपुर र अभिनेत्री आलिया भट्ट वैवाहिक बन्धनमा बाँधिएका छन्। बिहिबार मुम्बईको पाली हिल्समा रणवीर र आलिया वैवाहिक बन्धनमा बाँधिएका हुन्।
मुम्बईको पाली हिल्समा रहेको अर्पाटमेन्टमा दुई बीच विवाह भएको भारतीय संचार माध्यमहरुले जनाएका छन्। वैवाहिक समारोहमा परिवारका सदस्य, नजिकका आफन्त र दुवैका नजिकका साथीहरुको उपस्थिति रहेको थियो।
रणवीर र आलिया पाँच वर्ष देखि प्रेम सम्बन्धमा थिए। गएको एक वर्ष भन्दा समय देखि दुई बीच विवाह हुने चर्चा चलिरहेको थियो।
तर केहि साता अगाडी सम्म पनि दुईको विवाहलाई अफवाहको रुपमा हेरिएको थियो। तर बिहिबार भने अफवाह भनिएको खबर सत्य सावित भएको छ।
भारतीय संचार माध्यमहरुका अनुसार रणवीर र आलिया बीचको विवाह हिन्दु रीतिरिवाज अनुसार सम्पन्न भएको छ। आलिया र रणवीरको विवाह ४ पण्डितले गराएको बताइन्छ। ७ फेरो लिनु अगाडी लगन गाँठो बाध्ने काम करण जौहरले गरेको भारतीय मिडियाहरु बताउँछन्।
विवाह समारोहमा निर्देशक आयान मुखर्जी, अमिताभ बच्चनकी नातिनी नब्या नवेली, करीना कपुर खान, सैफ अलि खान, करिस्मा कपुर, महेश मट्ट, पूजा भट्ट, आकांशा रन्जन कपुर सहित विभिन्न बलिउड हस्तीहरुको उपस्थिति थियो।
वैवाहिक समारोहमा तस्विरहरु पनि सार्वजनिक भइसकेका छन्। नायिका भट्ट आफैले तस्विरहरु सार्वजनिक गरेकी छन्।
तस्विर: आलियाको इन्स्टाग्राम
