पोर्चुगलका कप्तान क्रिस्टियानो रोनाल्डोले स्विट्जरल्याण्ड विरुद्धको जितपछि सामाजिक सञ्जालमा प्रेरणादायी सन्देश पोस्ट गरेका छन्। सेलेकाओले गए राति (जुन ५) युइएफए नेसन्स लिगमा आफ्ना प्रतिद्वन्द्वीलाई ४–० ले हरायो।
विलियम कार्भाल्होले खेलको पहिलो गोल गरेपछि रोनाल्डोले पहिलो हाफको चार मिनेटमा दुई गोल गर्दै आफ्नो पक्षलाई तीन गोलले अग्रता दिलाएका थिए। म्यानचेस्टर सिटीका राइट ब्याक जोआओ क्यान्सेलोले ६८औं मिनेटमा फर्नान्डो सान्तोसको टोलीको जितमा चौथो गोल थपे।
जित पछि, क्रिस्टियानो रोनाल्डोले सामाजिक सञ्जालमा यस्तो सन्देश पोस्ट गरे (पोर्चुगालीबाट अनुवाद गरिएको): “हाम्रो यात्रामा एक धेरै महत्त्वपूर्ण विजय, यस समूहमा धेरै गर्व र आत्मविश्वास, पोर्चुगिजहरूलाई हामीले चाहेको कुरा दिनको लागि धेरै शक्ति: विजयहरू र विश्वस्त प्रदर्शनहरू।”
३७ वर्षीयाले थपे: “यो सिजन समाप्त भएको जस्तो लाग्छ तर वास्तवमा … यो केवल सुरुवात हो!”
पोर्चुगललाई नेसन्स लिगको समूहको शीर्ष स्थानमा पुर्याएकोले स्विट्जरल्याण्डमाथिको उक्त जित निकै महत्वपूर्ण थियो। स्पेन विरुद्धको पहिलो खेल १–१ को बराबरी खेलेको पोर्चुगलले दुई खेलबाट चार अंक जोडेको छ। नेसन्स लिगको समूह चरणको आफ्नो तेस्रो खेलमा चेक रिपब्लिकसँग जुन ९ मा रोनाल्डोको टोलीले अर्को खेल खेल्नेछ। त्यसपछि जुन १२ मा पोर्चुगलले स्विट्जरल्याण्डसँग स्टेड डी जेनेभमा रिभर्स खेल खेल्नेछ।
